唔知有無朋友同我一樣，以前讀書時身邊無人打機，又宅女性格唔敢同陌生人打機，結果只會揀單機遊戲黎玩，RPG 嘅嘢我玩好多架，《幻水》《FF》《Tales》恕不盡錄……但係，自從近年加入 VJGamer，因而識咗唔少打機嘅朋友，總算開始學吓玩啲合作或者對戰遊戲，例如之前隻《Gundam Versus》由唔識控制，練到用隻 Gundam Mk-II 輕鬆 KO 對家隻精神感應高達，我有覺得自己幾叻豬架。
同朋友打機係爽嘅，係有共鳴嘅，不過，我之前一直唔明，點解大家講到 Mon Hunt 就眉飛色舞。沙嗲王對佢地黎講，係食住 MH 飯 聯住 3DS 打火龍嘅回憶；對我黎講，係同班腐女食住《刀劍亂舞》一路睇同人本嘅回憶。咩斷尾，咩充能斧，對我黎講，全部問號；當時《MHXX》移植 Switch，機友們好興奮呀，明明 3DS 咪打過囉，但都仲係好興奮呀，晚晚返去無人開 PS4 個個都打 Switch 呀。
呢個時候，我感到有少少空虛，覺得同班機友，有好大個 Gap（好似係）。
我想感受點解大家咁熱愛呢個遊戲，我想去明白點解 MH 對 Fans 黎講並唔係遊戲咁簡單，我想去知道 MH 對於大家黎講係一份點樣嘅浪漫。於是，出 Switch《MHXX》時，我終於首次接觸《MH》。
但係……由於機友們可以將 3DS 嘅 Data 過繼，所以個個一黎就爆 HR 高 Rare 裝，而我……仲記住 PSP 年代時《喵喵村》嘅回憶，結果，我走咗去練貓。簡單黎講，我都係無學到點樣成為獵人。我垃圾。
終於，等到《MHW》。
有人話佢易過以前嘅 MH；有人話《MHW》打怪「會有數值顯示」呢個設定太新手向。我唔理。我係新手，反正出 Game 當日成個 PSN 嘅朋友都 online 咁濟，基本上全部人都係打緊《MHW》，嗰個畫面，令人肅然起敬，嗰一刻，我明白《MH》系列喺玩家之間嘅凝聚力係幾咁強大。
但係，雖然話《MH》係一隻互相幫助嘅遊戲，但係我唔想一黎就菠蘿雞，淨係痴人打，自己唔去試的話，升幾高 HR 都無用，根本就學唔識啲技巧。
當我整好角色，入 Game，開主線任務，途中轉過幾次武器……呢個時候，其實我都仲係對《MH》世界一頭霧水。Anyway，試咗一輪，總算揀定自己用得順手嘅武器。雙刀、充能斧呢啲高手向嘅武器就不了，既然我怕死，一開始用遠攻，話唔定個心會定啲，所以我決定用重弩。
當自己一個過咗幾個主線任務之後，我自以為開始對遊戲上手啦，所以我決定跟朋友隊出去打一次。機友進度比我快，當時已經打緊雌火龍，一隻如果以我當時嘅能力去 Solo 打嘅話，應該會打到嘔白泡嘅龍（我當時枝重弩仲係 Rare 2 嘅廢嘢，傷害值極低）。
望見戰友充滿默契咁你一刀、我一斬；龍起飛時，佢發閃光彈，呢邊有人整陷阱，「插咗回復！」「喂斷咗尾先！」「爆唔爆頭？」「喂睇住雄火過緊黎……」面對住真正嘅狩獵，我再次感受到同隊友嘅距離感。呢個時候有人話「引佢落陷阱就搞掂」，我一時失神，居然被未中陷阱嘅雌火一個反身揮尾 KO。
shit，我力盡。
我望住自己比貓送返營地嘅心情，就好似當年打開 AL 張 Cert 發現唔夠分入頭幾志願咁，一樣咁茫然。
「對唔住，我貓車。」
個 PS4 Party 靜咗兩秒左右，然後開始出現「唔緊要」「嗰下反尾新手係難避啲」「佢嗰下係好痛架」呢啲鼓勵性嘅說話，但係我個心好沉重，明明對隊友黎講係輕鬆嘅任務，因為我技巧唔夠、經驗不足，搞到佢地報酬少咗。
同時，我知道佢地呢一刻包容我新手，但係，我如果唔進步，就只會成為老鼠屎。我要學嘅唔止係「獵人求生技巧」同埋「獵人狩獵技術」，仲包括埋「獵人世界知識」。好似佢地話遲啲 DLC 會出「恐暴龍」咁，我聽完問咗句「咩嘢恐怖龍？好恐怖架？」當下大家靜默或者爆笑嘅反應，都令我覺得自己嘅無知，就好似啲妹豬問男朋友「BB 咩嘢係越位啊？場波有咩好睇啊」一樣咁令人難堪。
我唔要自己拖累人。
我要成為獨當一面的獵人！
開 Game 第三晚，我決定，我要努力練功。
【延伸閱讀：新手MHW獵人日記第二章】
【延伸閱讀：新手MHW獵人日記第三章】
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。