《Dark Souls:重製版》(Dark Souls:Remastered)宣布推出之後,一直都未有新版既任何消息,不過其實唔少外媒已經收到並放出影片。今次既重製版將會支援 PS4 Pro、Xbox One X、Xbox One S 同 PC 4K 解像度,並且會穩定係 60FPS。而 Switch 係 TV 模式下就會係 1080P 解像度以及穩定係 30 FPS,手提模式就會跌到去 720P 及 30FPS。
今次呢條影片係外媒 GameSpot 所釋出,使用 PS4 Pro 主機進行演示。內容係由遊戲開場殺到不死院惡魔,然後再殺埋牛頭惡魔完結,歷時 30分鐘。係影片見到重製之後既光影效果變得更加豐富,材質貼圖更加清晰,而且係物件甚至敵人身上既畫面細節都有顯著強化。本身諗住買 Switch 版既我,睇完之後都決定買返 PS4/Xbox One 版算,係呢個位亦都提提大家,如果想用最平既方式玩 4K 可以選擇買 Xbox One S版本,無他既,而家買機平嘛。
除咗畫面質素大大提升之外,《Dark Souls:重製版》仲強化埋最為人詬病既連機功能(有玩過都知道 DS 系列連到機係恩賜黎),並且由原本最大 4人連線加到 6人,加入連線密碼功能。另外遊戲平衡度上面都做咗部份改動,PVP 方面亦都移除補血瓶之外既回復手段。
順帶一提,《Dark Souls:重製版》包含《亞爾特留斯》在內既全DLC,遊戲會於 5月25日正式推出,將會有 PlayStation 4、Xbox One、Switch 及PC 版本。