【讀者投稿】《戰場女武神4》通關後短評(有雷)

《戰場女武神4》係闊別七年嘅系列重啓作品。經過《2、3》嘅慘烈銷情同《蒼藍革命》嘅變革失敗後,重新放喺家用機上,以《1》為核心改進並重新劍指歐美市場。

 

首先講講遊戲性,今作嘅育成放棄咗《2、3》中較複雜嘅轉職及星盤系統,育成只需重覆刷關農經驗值就可以;對於故事變長,又並非手提機方便帶出街育成嘅《4》來講,呢個改動係親切嘅。不過,因為無咗自由配潛能,要育成一個超級士兵就有啲難度。

(育成兵科重回一代嘅簡單系統,只要消費經驗值即可)

 

無法育成超級士兵、取消咗劍甲、機槍兵、盾甲、重裝甲兵,再加入新兵種擲彈兵,今集兵種之間嘅平衡可謂做得比以往都好,各兵種都有一個作用同定位。擲彈兵開始好似好OP,但到後期敵方狙擊兵有迎擊同缺乏我方擲彈地型下,變成同對戰車兵一樣好依賴戰場巴士(裝甲車)。

BLiTZ系統嘅復活,若各位玩家只要抱住對一代嘅期望,你會對遊戲性滿足有餘

BLiTZ系統,歷代都無乜點變,穩打穩扎。介紹起來,可能直接用官方宣傳片仲快。

 

接落來,我就要講一啲有關故事上嘅感想;未爆機怕雷嘅人由呢度起退散。

 

《4》係第一次離開加利亞公國嘅舞台,玩家由衛國戰爭變成侵略帝國嘅聯邦軍加利亞人遊騎兵小隊。由1935年3月開始北十字星作戰以帝都為目標,陸路推進,打到1935年10月大徹退後開始天鵝座作戰,最後衝入帝都已經1936年1月~2月。時間軸上遠比起同樣係第二次歐洲大戰嘅《1、3》長(本作至第十三章為加利亞衛國戰爭結束)。

(十三章後嘅斷章,就提到帝國加利亞方面軍潰敗,帝國上層混亂中)

 

宣傳片成日提住「戰場上嘅青春物語」,呢個在我來講絕對係謊言,故事除咗頭4章係青春之外,後面都唔太見到呢樣嘢⋯第十八章末劇情中雷莉都吐糟講返呢段戰爭回憶一啲都唔好。

 

與《1、3》相比,本作在設定上係侵略戰,前四章都係喺聯邦舊國境內,玩家都仲可以有雷納解放戰等等具英雄感嘅戰役;但五章後聯邦嘅軍隊係打到入帝國國境,從市民對玩家嘅行為,玩家先係感受到自己作為一個侵略者而非英雄而來,從呢度開始,玩家可能要有一個心態調整:「我哋並唔係英雄」。

(第五章中,提醒玩家「戰爭並唔係英雄故事」嘅一幕)

 

當大家開始接受「我哋並唔係英雄」呢點後,第六章開始1935年10月嘅早冬初雪,玩家就開始一場大徹退,鄧冦克咁要退到150KM外嘅海岸線。故事中飢寒交逼、無補給、被追擊,如果你玩得夠投入,你會一直感受到嗰種絕望同無力感。直到第七章末,由友軍嘅覆滅到雪上巡洋艦登場,絕望先稍稍緩和,得到一個「得救啦」嘅感受。

(雪上巡洋艦初登場,用四門加速炮從奧斯柏夫手中救起遊騎兵)

 

但第七章末嘅救贖感維持到第九章一開始,你會見到大家都一定會重用嘅「凱伊」小姐成為咗敵方嘅情報員,而真正嘅凱伊就去咗帝國嘅科學特務隊做咗參謀⋯大概會令大家喺用凱伊時,感到有啲矛盾,同時又對發生緊咩事而一頭霧水。基本上並無留任何足夠玩家從不安感中喘息嘅空間。

 

對系列作熟識嘅玩家,一定會知道雙方都會有女武神,喺敵方女武神登場後,我方又唔似有任何有同遺蹟有關,或者有自我再生潛能嘅角色。第十章末出現嘅少女,基本上一出現,所有玩過系列作嘅玩家都可以估到佢係我方女武神,而且主動力爐中空,大家大概都會估到聯邦係點用女武神。但只係作為女武神電池會唔會有啲浪費呢?起碼對方嘅女武神都係一擊會擊沉戰艦嘅超兵器⋯抱住呢個疑問,玩家玩到第十四章,睇住騎士號嘅自爆,你就會知道女武神電池同雪上巡洋艦嘅真正用途:衝入去帝都,引爆女武神核彈。

(大家嘅A2爆彈)

 

去到呢度,大家都會知道凱伊真正叛變嘅原因,同埋或者開始會諗主角群喺呢場戰爭中究竟為咩而戰⋯甚至為咗衝入首都放核彈,要喺十六章送摯友、好兄弟去做敢死隊(呢度玩家仲要選擇多一個隊員,去感受庫羅德嘅感受)⋯到第十七章末,庫羅德喺拉掣引爆前,聽到停戰宣告。喺需要犧牲好兄弟先至衝到入首都嘅天鵝座作戰,埋門一腳嗰下先來停戰,嗰種一切徒勞、造化弄人、玩鳩我嘅感受就會湧上來。

(由OP開始己經不斷立FLAG嘅拉茲)

 

不過,由庫羅德決定唔拉掣嗰刻起,其實係呼應返第六章《戰禍的黑暗面》,戰爭使人瘋狂、扭曲人性,主角群並唔希望因為戰爭而變得瘋狂,而係一群渴望和平而參軍嘅人。停戰可以話來得太遲,又同時來得合時,等玩家同庫羅德,喺需要用安潔作為核彈大量屠殺帝都平民前,可以有得揀。尾段呢度雖然空虛,但起碼人始終仲可以維持係一個人嘅形態,而唔係一種只為戰爭而死活嘅生物。

來到呢度,《4》嘅故事既無《1、3》衛國戰爭嘅浪漫主義嘅英雄故事,更加有一種虛無主義嘅空虛,玩家奮戰將核彈送到去帝都,聽到嘅並唔係投降而只係停戰;對系列作嘅玩家來講,應該會更清楚一點,十三章加利亞戰線上嘅準皇太子戰死,帝國高層陷入政治危機佔咗停戰嘅一半原因。若果無加插彌涅耳瓦闖入艦橋,表現出因為仇恨、復仇心而想引爆安潔,就更加無機會畀庫羅德去申述:「停戰後嘅戰爭行為,並非戰爭,而只係大規模屠殺。」對於復仇心切、被戰爭渲染得瘋狂嘅人來講,兩者其實無咩差別;但對一直提到唔想變得瘋狂嘅主角群(E小隊)來講差別就大;而且一周目後嘅斷章《水蒸氣中的休戰》更加係為強化呢個決定嘅要素(同時間一個惡趣味係,玩家應該喺第九章開始嘅故事中,唔太會放過任何一個敵方狙擊兵)。

(充滿老婆濃濃的愛嘅狙擊槍)

基本上,我同好多網上嘅評價一樣,故事上3>4>1>2;首先,3嘅英雄感充足,被逼放到無名小隊、被判為判國者,但仍然為國家而戰,最後除咗叛逆到災厄之鴉嘅古斯格外,全員生還。《3》畀出來嘅成就感,同埋最後人人善終嘅感覺係好好嘅;《4》雖然拉茲犧牲,戰事一直劣勢,停戰來得太遲嘅空虛感,甚至通關後,庫羅德仲要被聯邦取消戰時晉升、雪藏;但能以第二次歐洲大戰嘅真正參戰國聯邦視點去睇呢場戰爭,對系列世界觀補完同打好基礎係相當重要。《3》相對於《4》優秀嘅係玩家嘅感受面,《4》雖然會令玩家難受,但呢種難受,或者正正係要要大家放低「戰場野餐團」嘅期待,用故事中營造嘅沉重心情去睇呢場慘烈戰爭,大概反而對呢種虛無而又反英雄主義嘅戰爭描述一一細味,並從中了解到其中反戰嘅意味。

(與我方一片慘烈同壓抑下相比,敵方女武神今次難得有個GOOD END。)

 

 

古渡

古渡 《Pokemon XY》400小時遊玩時間,天梯賽1700以上嘅非專業玩家。閒時會寫下嘢咁

追蹤

更多文章