文長，涉及劇透，總結在最尾，想睇評分可直接跳到最後。

Far Cry 5 宣傳既時候其實我真係好受吸引，一直至到遊戲推出，玩左兩三個鐘之後，我都仍然覺得今次Far Cry 題材揀得啱，背景設定唔錯，玩落射擊手感雖然有少許問題，但同前作比都仲有進步，有些少BUG 不過遊戲最終仍然能夠進行，算係無傷大雅，應該可以一玩。

上面果一句係我推出初期拍片比既評語，直至到我玩左一半之後，我發現我真係太天真喇！

就如同你「有那麼一刻覺得TVB 既劇集係好睇，佢一定係抄既」一樣，只要「有那麼一刻覺得Ubisoft 出左一隻好game，你一定係錯既」

以下我又來討論下Far Cry 5 既優點同缺點。

支線有進步

只要Far Cry 既支線，能夠同佢個背景故事係有關係我已經好開心。今次不特止，仲加左好多Fallout 既黑色幽默上去，再連同招朋友果陣既互動，令到成個背景故事既敍述生色不少。

當然，係地圖活動方面，就不得不讚Prepper Stash 呢個藏寶設計幾有心思。係自由探索世界既過程中，亦都帶到不少硬性解謎既樂趣比玩家。最緊要係大部份既寶藏地圖設計都不俗，只可惜玩家既收獲來來去去都係果兩樣野，後來有D 悶啫。

Far Cry Arcade

大概係受到The Division, Ghost Recon: Wildlanes 既影響，Far Cry 都知道而家整一隻game，而又唔整online mode 係一件幾咁愚蠢既事。因為Youtube 同Twitch 既關係，多左好多人玩影片爆機，根本就唔打算再去玩單人故事遊戲，相反，多人遊戲例如LOL, PUBG 同Fortnite 就越來越多人支持同課金。一隻遊戲唔整Online mode 根本就做唔到落去。有見及此，Far Cry 唔知邊個天才就諗到不如將Far Cry 4, 5, Primal 同埋Watch Dogs 既素材一齊隊哂落去叫D 人自己整地圖丫！

即係PUBG 同Fortnite 得咁少地圖同內容D 人都可以無限玩，如果人人都可以整地圖，咁應該會成為另一個熱潮喎！

本來就應該係既，而家我地已經見到不少高質既地圖抄襲，例如經典既de_dust2 或者係Resident Evil 7 間房咁。但係地圖編輯器唔係mod, 玩家最終冇可能導入個人素材，而且唔可以用程式碼自己寫Game mode，到最後Arcade 上面比較多人玩既內容都只會係官方為社群推出既Arcade update，咁就冇左自行創作既意義。即使出現鮮有既地圖設計創作，亦都會受限於官方既武器同埋game mode，最終變得千篇一律。

話說你明明食正Battle Royale 條水，跟住推出地圖編輯器，咁點解唔直接整100 人連線對戰呢？咁你咪唔洗自己出手都可以做埋PUBG 囉！

呃……一時間醒唔起你係Ubisoft 添…….係囉，12 人連線都已經好難架喇可……..(苦笑

成功提高玩家生活質素

遊戲界中，有一樣野係成日會提起，就係玩家既生活質素。嗱呢樣野係絕對超越UI (遊戲介面)，甚至乎係而家好興既UX (用戶體驗)，係只有遊戲先會有既項目。係上集，同埋上上集既Far Cry 入面，遊戲有好多令人難以想象，摸不著頭腦但係仍然一直流存落來既Bullshit。例如唔知點解係都要爬電訊塔啦，爬完電訊塔又唔知點解會開左新活動啦(最搞笑既係你唔爬，九成機會唔會就咁見到D 新活動)。跟住仲有獵動物來到升級角色裝備啦 (一直到Assassin’s Creed: Origin 都仲係咁)，傳送點永遠只係果幾個safe house 啦，永遠只有果幾個safe house 先有商店啦！

其實唔少遊戲都有所謂提高玩家生活質素既修正，例如The Witcher 3 都係後來先加左個旅店共用既箱啦，好多Online game 例如Destiny 都係第二集先識自動幫你將金裝歸埋一齊啦。亦都有D 遊戲係完全唔會去理會呢樣野，例如你老尾Skyrim 到而家個Menu 都係一pat 屎咁啦 (如果大家有玩電腦版去裝個SkyUI 就會知一個正常既、滑鼠同手掣都啱用既UI 係應該點整)。

好多人都覺得生活質素既修正其中一個最大既問題就係佢同隻game 好大機會會唔夾，好似The Witcher 3 咁，明明隻Game 係偏真實向，無啦啦旅店會有個魔法箱得你一個可以用真係好咩？所以方便玩家之餘你改既野一定要夾隻遊戲本身先會唔會好事變壞事。

Elex 雖然係一隻shit game ，但某程度上佢又有唔少啱既做法，例如旅行商人。Far Cry 5 今次就有旅行商人，作為NPC 佢地除左可以隨時比你買賣野之外(多數係賣)，佢地仲可以融入埋係遊戲入面為玩家提供資訊。例如佢地又可以話埋比你聽邊度有邪教陣地，邊度有寶藏同邊度有支線任務等等，令到成個世界更加融為一體。

其次，向Skyrim 作參考之後，除左本來既電訊塔同陣地之外，所有重要既地點(總之即係有野會做既地方啦) 都變哂做傳送點，而又由於地點之間本來會有關連 (咁你只係一個鎮，所有地點都肯定有關連架啦) 所以好大機會做任務唔需要跑來跑去太多次，或者只需要行好少一段路就得，亦係一個相當利民既做法。

係角色成長方面，佢終於都放棄左狩獵野生動物來整裝備既系統。而直接改為升級點數系統，總之係同一個成級點數池入面，你可以加哂你認為有用既野，包括加裝備同子彈攜帶量等等，希望大家唔洗再周圍搵動物獵，呢個係前幾集遊戲令人相當討厭既系統。

但係討厭還討厭，呢個系統係有佢存在既價值。以下落來我地睇睇佢既缺點。

Sandbox 開放世界遊戲唔係咁整架！

開放世界遊戲將玩家放係一個開放既地圖入面，唔規定玩家要先做邊個任務，從而將玩家既遊戲體驗某程度上變成半自訂，以使得單人遊戲模式變得多樣化。

而Sandbox (沙盒) 就更進一步，玩家多數情況下(最好既當然係所有情況下) 都有一種以上解決問題既方法。RPG 來講，好多時另一個方法就用嘴炮解決，Far Cry 來講，正面槍戰既另一個解決方法就係潛行暗殺。

好奇怪地，Far Cry 甚至刺客信條一路以來都冇放棄過開放世界路線，唔知點解去到Far Cry 5 成件事會唔同左。

Far Cry 5 入面，玩家只要係某個地區做完主線支線或者雜項任務，都會得到反抗軍點數，點數夠左，主線就會自動進行。你冇聽錯，係自動進行！同其他遊戲果種標明係主線任務，而且一旦開始就會發生劇情上無可扭轉既變化唔同，佢係強行對你既劇情進行無可扭轉既變化！

喂咁樣強制要人做主線本身就已經唔算係開放世界遊戲啦！

即係如果佢果種強行既做法可以微妙D，唔覺唔覺咁，即係例如點數滿左，你再去做任何一個任務，佢隨機就搵D 野出來fake 你，然後你就奶左野要去做主線，咁都OK。咁樣算係我自己探索一個開放世界隨機地中左伏啫，已經成件事唔同哂。

而唔會係我啱啱解放完一個陣地，啱啱夠咁多點數，然後我企係十幾廿人既自己友中間，突然我都會比你無啦啦捉到丫……..成件事根本就係Bullshit!

然後去到Sandbox 方面，其實一直以來Far Cry 既Sandbox 真係做得唔錯，每個營地同埋主線任務既關卡設計都可以睇得出真係付出左好多既心機去諗，點樣先可以令到玩家正面交鋒時有挑戰性，而又有咩巧妙位係潛行既玩家可以出奇不意咁使用，無聲無息咁做哂成個任務都唔比人發現呢？認真，每個地圖都做得唔錯。

尤其是有時去玩尋寶任務，部份既寶藏係要你玩爬山，不斷咁跳直至你去到山頂為止。其實去到中後期大家有直升機，可以攞到提示之後直接飛上去，真係不失為一個搞笑得來又實用既解決方法。

咁點撚解你去到主線地堡既時候反而乜都唔整呢？

每次去地堡救人既時候，我地都面對住一個封閉式既遊戲關卡。佢個佈置或者敵人出現既位置設計極差唔在講，唔知點解成個地堡都唔見有潛行元素……你唔好同我講踎底掉石仔引人過來暗殺或者用箭射佢地就潛行左呀，我真係搵箭射你架！

一個封閉既地堡要玩潛行暗殺/逃出，對於一個關卡設計師來講真係出哂水。Deus Ex, Dishonored, 人地果D 就叫做潛行喇！一個真正Sandbox 式既關卡設計其實最容易係封閉既空間度展示出來。上有通風槽，下有管線槽，連同樣係第二身射擊既Wolfenstein 都深明呢種設計既真意，在於係場景設計中加入隱匿、探索同埋思考等等既要素。玩家最後可以唔比人發現過關，甚至可以再勁D，一人不殺都過關。

而你回望你既Far Cry 5 最後都係要暗殺哂D 人，仲要係單線暗殺哂D 人…….冇分支，冇探索，冇隱藏要素，冇驚喜……..成隻game 最令人憤概既地方莫過於此。

個遊戲設計，浪費緊個遊戲設計

我唔明，其實Ubisoft 自己，或者主流媒體評論既時候，其實有冇玩過隻Game 架？點解會冇人提出佢反抗軍點數呢個遊戲設計，係浪費緊成個遊戲既其他設計？

講起反抗軍點數呢樣野，我諗起Bioware 係Mass Effect 3 同Dragon Age Inquisition 入面既戰力總和系統。其實同Far Cry 5 差唔多，就係你做主線支線或者無聊收集任務果陣你就會加戰力點數，而你需要有某個數量既點數先可以繼續你既主線。

當然啦，如果Far Cry 5 個戰力指數係有實際作用既話我會更加開心啦。例如夠某個點數你就會見到成個區少左甚至乎冇哂敵人。夠某個點數你解放營地既時候敵人call 唔到支援，或者係直頭變左你call 支援然後夾手夾腳攞返屬於佢地自己既地方呀……(係囉我都唔明點解係佢地要攞返佢地既地方但永遠得我一個人打) 咁世事冇完美既Mass Effect 3 同Dragon Age Inquisition 入面你既戰力點數同實際gameplay 亦都唔撚關事，所以我都唔要求太多喇

唯一既問題在於︰你唔覺得佢既點數太快集滿咩？

其實成件事就係源於佢果個死人主線設計係要捉你返去，而佢又只可以捉三次。因為係敵人做主動，所以佢一定要好肯定你可以填得滿條BAR，如果唔係主線你都做唔到。

其他開放世界既遊戲或者RPG其實如果真係要計呢D 點數，個點數你係集唔滿架。你都可以去試下既，但係你除左所有既支線，無聊收集任務同埋收集要素之外，你仲要觸發到你想觸發既隨機劇情，諸如此類你條BAR 先填得滿。而一般非成就向既玩家其實只要去到六成，主線就可以開啓。因為主線係玩家做主動，所以佢唔會SET 最高點數限制，而係最低。代表住你可以享受遊戲製作者為你編寫既世界同支線既同時，你亦都可以唔洗理太多衝主線即可。

咁大家明白Far Cry 5 有咩問題未？而家無論你係完美主義者，定還是想衝主線，你都冇得揀。完美主義者因為你只需要做地圖上大約三份一既野你已經比人強制捉左入主線，根本都未來得切睇清楚個地區你已經玩完個區域BOSS 任。及後你再做既任何埋都唔會再影響反抗軍點數，咁…….我做來個意義係乜野呢？係咪有成就呢？多數情況下唔係……係唔係你個支線寫得好好？未好到我會連同主線冇關都走去做咁好囉…..你話比槍同錢我，嘩我求其去開幾個寶藏我多錢到洗唔哂添啦！

一瞬間，整個地圖三份之二既活動對於玩家來講變得毫不相干，因為你已經冇任何實際既誘因可以驅使玩家去做佢地。本來幾好既大型story mission, 關卡有三條路線比人潛行又得衝鋒又得，夠哂Sandbox 又有故事睇。本來幾好既陣地解放，又係有幾種攻略方式，唔同既制高點潛入點破壞點等等比人去探索……

冇啦，冇喇，唔洗做喇，點解呀？因為我做左兩個無聊支線，又突然手痕炸爛左佢幾架貨車，無啦啦我就夠反抗軍點數比人捉左去打主線，跟住我都打完大佬啦，咁點解仲要繼續玩呢？

真心，你對得住設計果D 關卡任務既人咩？你對得住寫故事果個…..你對得住配音條友咩？FUCK!

就係因為你個仆街遊戲設計到敵人主動捉你去打主線，你浪費左成個遊戲千千萬萬樣其他人勞心勞力既設計呀！你點賠返比我，你點賠返比佢地呀！

遊戲武器太少

我都唔知呢條題點度好…….遊戲武器太少好似唔係好重要既問題，個問題仲在於咁點先算多點先算少呢？咁好難講落去架喎，但你睇埋我呢段野你就會明。

如果唔計近戰武器，炸彈同埋只係加左skin 既槍，Far Cry 5 仍然有36 款武器，咁算多定算少呢？如果你只係計單機既開放世界遊戲，其實都算幾多幾足夠，尤其是單機遊戲好多時要求每款武器係性能同操作上都要有自己既特色，整得多但把把一樣反而唔係好事。

但係以一隻多人連線既射擊遊戲來講，係好少。Far Cry Arcade 似乎無視左呢個現實，因為即使多人遊戲成隻game 都冇打算整多幾把槍入來。似乎佢冇考慮過點解玩家要去玩你呢個多人遊戲模式。Call of Duty, Battlefield既玩家之所以不停咁玩，就係因為遊戲有無窮無盡既升級選項，需要佢地不停玩去解鎖嘛。你總共就係得36 支槍………咁玩完冇架喇喎……

返返去單人遊戲，Far Cry 5 本來都有唔錯既解鎖系統，多數情況下你都需要有足夠既反抗軍點數先可以得到某樣武器，即係隨住主線既推進，你點都會解鎖哂。

但係Far Cry 5……或者係Far Cry 5 既玩家啦！嫌主線推進都唔夠快咁，明明已經捉你去打主線，打完就可以解鎖武器架啦，仲唔夠快咩？佢地唔知邊個人用屎忽諗野會出到條橋係要課金買單機入面既武器……….

天呀！難道你隻game 好地地就一定唔可以冇課金既元素咩？最慘都唔係呢樣呀！最慘既係上次因為大家話Assassin’s Creed Origin 如果唔課金就搵唔到最強裝備之後，今次佢既最強裝備除左可以用課金買之外，仲可以用game 錢買呀！

用Game 錢買都唔係一個問題，最大問題係佢今次有藏寶地點，每個地點都勁多錢，於是我可以直接用錢買到跳三個主線級別既武器呀！即係我一開始，就已經可以解鎖全遊戲最勁既武器，順手買埋鏡呀，彈匣升級呀果D，根本就唔洗做主線呀！

如果係咁既話中間果堆中途解鎖，冇咁好用但係比人頂住先既中階武器邊個會用呀…….就算係被逼要執敵人武器既關卡或者情節，都永遠唔會有人敵人係用中階武器架喎，永遠都係最渣或者最好。咁果堆武器既存在意義係咩呢請問？

即係佢地既作用就同你果D 因為遊戲設計注定冇人去既任務一樣，因為冇人買，又冇得執，果堆武器就係用來玩鳩D 武器設計師既！

我屈指一算，成隻game 我打到爆機都只係用過五款槍！真係一隻手數得哂。根本有錢就一定會去買最勁既槍，冇得用果陣去執點知又係執到最廢果支，來來去去根本都冇出現過中階武器，呢個先至係我話遊戲武器太少既主要原因。

最ON9 既係，明明佢只要唔整課金選項，就唔會發生咁既事…….

跟住果D 咩遊戲故事太ON9 呀，遊戲太多BUG 呀，個AI 隊友其實仲慘過冇隊友呀，我已經唔想再講，文章有D 太長，我不如直接講埋最想講既缺點啦

缺乏創新、迷失方向

老實講，大家係心入面老實答，如果你有玩過Far Cry 3, 4 ，然後你同Ubisoft 一樣打算整第五集，嗱先唔好講你會揀咩題材或者寫咩故事先，因為Ubisoft 呢個第五集題材同故事本身都shit，根本冇任何競爭力。

係遊戲系統，遊戲設計，整體大方向上，你諗出來既Far Cry 5 ，同呢隻真既分別大唔大？

講真，Far Cry 4 同3 本身已經唔大分別，去到5 就更加冇咩分別，玩過3 同4 既玩家，大概都已經知道要點整。咪又係主角一個人流落去唔知邊度跟住就加入一個反抗軍然後打一班壞人，中途就啪下毒品迷一迷幻咁最後就贏左囉，咁唔係點啫，仲可以點整啫！

咁咪係囉！我都諗到啦！點解要比幾百蚊買來睇你點整呀！比D 新意OK?

常言道一間公司要做SWOT，但一間遊戲公司認識自己既短處比起認識自己既長處更加重要。遊戲係一種扣分制既比賽，就算你核心長處做得有幾咁好，大家都只會因為你既短處而不停咁係你既基礎上扣分。如果一個唔覺意你意識唔到自己既短處仲要發大左來搞，破壞左遊戲既核心體驗，咁就GG 喇…..

Far Cry 應該係點整真係你知我知單眼佬都知，但Far Cry 5 不單冇係自己壞蛋角色或者劇情呢D 長處上發揮應有既水準，反而Bug 同遊戲體驗改善都唔大，為玩家帶來刺激同投入感既冒險亦都唔係正常發揮。

我淨係呢篇文都已經唔止一次講左D 可以改善既方法，雖然不少係抄其他遊戲，但Ubi 又有邊次唔係抄自己或者其他遊戲啫！佢今次係連抄襲既心都冇埋呀！

好似Fallout 咁，行行下突然有遭遇任務，然後你就要去打主線，咁咪強逼得來又好似係自己發現咁囉！好似Dishonored 咁，係封閉地圖入面諗好D 關卡設計，咁你係人人必經既主線地堡關卡入面咪可以展示你最強既Sandbox 優勢囉！你求其是但搵一個Prepper Stash，係唔解謎既，好似Left 4 Dead 咁Horde mode 得唔得？好簡單架咋喎，你攞完提示，入到去，跟住中左Bliss 然後係個夢幻既空間入面不停咁打喪屍同埋走佬，直到你走到走唔到 POOF!! 跟住你就醒返發現寶藏就係面前。明明成隻Game 有好多寶藏係考驗玩家解謎能力，又有好多係考驗你Platforming 既能力，但係冇一個係考你戰鬥能力架喎………

喂，求其整一個係潛行既，比人發現佢地即刻炸左個寶藏都可以啦！

根本佢地就係冇心整好佢！

所謂AAA 大作，乃係遊戲業界之中最頂尖既作品，理應站在遊戲業界既最前端。即使當年離開左Ubisoft 既Crytek ，整出來既Crysis 無論咩方面都只係中規中矩，佢係遊戲畫面上既表現即使去到今日都係令人驚嘆既！就算Ubisoft 既The Division 係有幾咁差，幾咁屎，幾咁爛，佢用上Snowdrop Engine 之後果種場景上既即時變化 (車頂上既腳印，即時閂車門，真實玻璃子彈痕跡) 都為推進遊戲科技付出一分力。

Far Cry 5 係冇呀！乜野都冇！當我寫呢份評論既時候我一邊玩緊新戰神。如果我玩過以前既所有戰神，而想整一隻新既，我就真係諗唔出而家PS4 呢隻喇！當Bioshock Infinite, The Last of Us, 不斷重疊既知識係度教緊我地點樣寫隨從AI 既時候，Far Cry 5 就比個一出場即刻自炒飛機既飛機師同伴比你…….

Far Cry 5 有AAA 大作既宣傳，有budget，有製作水平，但係完全冇諗住創新，更加唔會理會你覺得佢好唔好玩。反正宣傳夠喇，有人買哂，佢就有錢賺！呢D 唔係整遊戲，根本就係龐底騙局同埋倫敦金，係詐騙！

總結︰Ubisoft 返屋企食屎啦！

遊戲基礎分︰70

一次又一次，一次再一次。悶冇創新都唔係第一次，我都算。Ghost Recon 同For Honor 因為知你Ubisoft online 實死硬，神早棄左Game。刺客信條好似有改善咁但最後又係悶，唉我忍多你一次Far Cry 5 睇下會唔會好少少……..即係大家都諗到其實都唔洗你整啦！成個系列咁多年來越做越一樣，越改就越錯，但好似成間公司當冇件事咁。因為佢出廣告好睇，跟住我又ON 99 咁走左去買丫嘛！