【遊戲感想】《DETROIT Become Human》唔玩會後悔。2018 遊戲界最佳藝術品

 

雖然 2018 年只係過咗一半,但係,我膽敢講一句:《Detroit Become Human》絕對係今年 PS4 平台上面最出色嘅作品之一。唔少朋友話「隻遊戲淨係揀選項,欠缺遊戲性」,對此,我不敢苟同,就算只係選項遊戲,但係,當你每一個微小嘅動作,卻能夠造成遊戲中成個劇情嘅變化,呢啲係咪叫蝴蝶效應?(笑)如果你因為佢唔係動作遊戲而漠視呢隻 Game,我真心覺得好可惜。

遊戲由 Markus、Kara、Connor 三個「仿生人」嘅故事組成,三個角色嘅劇情表面上係分開進行,但係你於每個角色路線中嘅決定,都會影響另一個角色嘅劇情甚至生死;遊戲淨係角色 End 都有幾個,仲未計主線嘅結局……(遠目)

 

寫呢篇文嘅時候,我已經以兩種唔同嘅走向,完成遊戲兩周目了……不過兩周目又如何,遊戲中都仲係有結局或者隱藏嘅細節仲未解鎖到,到底呢個 Game 有幾多變化?到底工作室 Quantic Dream 諗乜?點解可以寫到一個咁龐大而完整嘅劇本出黎?

 

我成日覺得佢好有《Lost in Translation》年代 Scarlet Johansson 嘅感覺

 

呢班名為「Android 仿生人」嘅高智能產物,佢地無血無肉無痛楚,但係,一旦佢地有了情感、有了喜惡、有了個人想法,是不是就能稱之為一個「物種」呢?

 

擁有感情,擁有了心,是否足以被稱為「生命」?

 

而另一方面,我地呢班人類,喺遊戲入面口口聲聲鬧啲 Android 係爛鬼塑膠,但係,Alice 個老竇沉迷吸毒又虐兒、Markus 個畫家主人 Carl 明明有個親生仔 Leo,但係 Leo 就只會伸手拎錢同埋激老竇、至於 Connor,佢去查夜總會事件時,嗰班去消費嘅男人,居然有住恐怖而奇怪嘅性癖好……

係呀,呢班人係人類;但係,佢地連人類最基本嘅「人性」都好似無咗。咁樣嘅話,作為人類又真係比較高尚嗎?

 

連性工作者都由 Android 取代,仲有咩工係需要人做?LOL

連我正職做占卜,都可以比 Android 取代呀……

 

當然啦,你可能會話「但係,係因為 Android 取代哂人類工作,先有咁多人失業、生活受苦,因而情緒失控」;咁但係一開始研發出 Android 嘅,都係人類黎噃!你地想要免費勞工、想要無限軍事力量,咪搞到咁囉!

世界之所以會變成咁,有因必有果的,而呢一切,似乎都係人類自己造成。

 

養寵物,最怕生離死別;但換成 Android 的寵物,又真的有意義嗎?

 

三個角色入面,如果要比喻嘅話,Markus 代表「革命」,Kara 代表「母性」,Connor 代表「掙扎」,而我本人最鍾意嘅角色亦都係 Connor。因為佢嘅路線同埋心理變化,最令我感受到「Android 對人性同埋生命感到掙扎」嘅情感;當然佢同 Hank 副隊長嘅感情線,都令我好醉心,詳細我會另外寫文再講(喂)

 

呢個遊戲好多安排都政治正確,警局高層係黑人,連 CyberLife 創辦人個老師 Amanda 都係黑人(我重點有沒有放錯了?)

喜歡這個路線總有我嘅原因(笑)

 

雖然我最鍾意 Connor,不過最令我驚喜嘅,其實係 Kara 路線嘅劇情。佢無好似 Markus 咁,諗住要為 Android 爭取人權咁偉大;佢只係有種責任感,覺得要帶住 Alice 逃離父親(唔理你有無整死佢老豆都好)、覺得自己有責任比 Alice 快樂嘅生活。

 

 

 

以下大雷劇透注意

以下大雷劇透注意

以下大雷劇透注意

 

 

 

但玩到後期,當知道 Alice 真正嘅身份原來都係一部 Android,我好驚訝,同時心中有好強烈嘅失落感。原來一路上我小心翼翼守護嘅 Alice 根本唔係人類!當時我不禁喺度諗:Alice 對 Kara 母性上嘅依賴,會唔會只係 Alice 個程式安排嘅反應黎嘅呢?

諗到呢度,我有少少空虛;而下一刻,我諗到 Alice 老豆。

一個「人又無,錢又無,老婆又走佬」嘅三失中年肥佬,相信大部份玩家同我一樣,憎到佢裂;但諗深一層,佢面對生活壓力,財困,搞到有心理問題,結果用錯方式靠毒品解脫。但係,有打開過 Alice 房中木盒嘅朋友,或者會留意到,Alice 盒入面張全家福,個細路女,同 Alice,似乎完全唔同樣。

我唔知係美術效果定我眼花啦,但係,老竇將 Alice 買返黎當係女黎湊,呢件事係事實。到底幾咁寂寞、同埋幾唔能夠面對現實嘅男人,先會喺老婆(可能帶走埋親生女)嘅情況之下,都要買返個女返黎陪自己?

一諗到呢度,我都有少少心酸的。

 

 

Kara 路線另一個令我喊出黎嘅位,係遊樂場搵地方過夜嘅劇情。雖然,遊樂場啲工作人員衝入黎嗰下,發生得非常似《Walking Dead》而令我深夜嚇咗一嚇(笑)不過……

一班被遺忘在遊戲場裡嘅 Android,當此地人去樓空,已經無人記得佢地了,但係佢地嘅願望,都只不過係想再次令別人得到笑容,令別人快樂;而因為 Alice 嘅到來,佢地終於有機會再次亮起沉寂而久的旋轉木馬。

Alice 笑了,呢班 Android 喺停止運作之前,總算得到安慰,可以帶著最後美好的回憶離開了。

 

呢一段令我落咗幾滴眼淚

 

不過,我所提及嘅劇情,只係佔咗遊戲中嘅好少部份架咋!如果各位同學有時間,真係不妨試多幾個唔同嘅選項,話唔定你會有不一樣嘅感受。

除咗電影般精細嘅劇本之外,《Detroit》喺美術以及配樂方面都落足功夫,如果今年嘅 Games Award 無畀獎呢個遊戲,我一定會寫信去投訴 LOL(人地識你老鼠…)

 

遊戲場景設定圖

變成遊戲之後,場景依然優美

 

最後,嫌我長氣都要講多次:

《Detroit Become Human》雖然表面上係隻選項遊戲,不過啲 Options 全部要玩家打心理戰,而遊戲中其實非常多 QTE,反應慢啲都會死人架,所以絕對唔係「無遊戲性」;相反,佢嘅遊戲性唔在於動作部份,而係在於玩家要點樣捉心理。

如果你問我會為呢個 Game 打幾多分……或者我會咁講,佢唔只係一個遊戲,我會將佢視為近年難得嘅傑作,一件藝術品,而家我都好後悔無預購個 Box Set 返黎收藏……(遠目)

 

不過,數位版附送嘅 PS4 主題真係好得意,會有巡邏機喺度飛黎飛去 LOL

 

呢篇感想不知不覺寫到好長,多謝你睇到呢度。
今年可以玩到一隻咁出色嘅遊戲,我好感恩(合十)

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。首本個人塔羅散文今年書展上架:shorturl.at/iDMWY

追蹤

Facebook 更多文章