【老任出大絕】《Pokémon》大晒冷 全新作品三連發

相信各位 Nintendo Switch 機主都等咗好耐《Pokémon》新作既消息,係今日 The Pokémon Company、任天堂、Game Freak 以及 Niantic 進行咗《Pokémon》新作發布會,除咗之前已經有風聲既《Pokémon Let’s Go!比卡超》同埋《Pokémon Let’s Go!伊貝》之外,仲有 2隻《Pokémon》新作,完全係出大絕!

 

先講講今次發布會重點遊戲《Pokémon Let’s Go!比卡超》、《Pokémon Let’s Go!伊貝》。

二隻遊戲都係以《Pokémon 比卡超版》為基礎,加入全新既體感操作方法、單一 Joy-Con 控制、雙人單機遊玩等等要素。另外本作最大賣點就係可以同《Pokemon GO》進行連動,係《Pokemon GO》內捉到既精靈可以直接傳輸到 Switch 內。

 

係一般情況下將會好似《Pokémon Go》咁,見到野生 Pokémon 直接掉個精靈球埋去就得,唔需要戰鬥。如果雙打時二人同時掉出精靈球就會提升捕獲率。當遇到其他精靈訓練員時,就會進入戰鬥畫面,如果雙打情況下仲可以一齊戰鬥。

 

另外官方仲會推出專用裝置「精靈球 Plus」,呢舊野除咗同 Joy-Con 一樣可以作為控制器之外,最正既地方係當你用「精靈球 Plus」捉咗精靈入去之後,會對應返唔同既精靈發出相應既顯示燈、叫聲、震動,真係比到種帶住精靈周圍走既感覺大家。

 

不過根據資料今次作品只有關東 151隻 Pokémon +(1隻新嘅特別寵)新果一隻,估計應該係利基亞劇場版中伊貝進化版,不過新既就得呢隻,期待新精靈既可能會有少少失望啦。

 

《Pokémon Let’s Go!比卡超》、《Pokémon Let’s Go!伊貝》預計 2018 年 11 月 16 日全球同步上市,同以往版本一樣,《Pokémon Let’s Go!比卡超》將會有比卡超作為夥伴跟住,伊貝就有伊貝咁囉。

 

 

另外一隻新遊戲,就係由一直負責開發《Pokémon》系列既 GAME FREAK 操刀,叫做《Pokémon Quest》既遊戲。

係《Pokémon Quest》內,所有既精靈都會變成四四方方既方塊造型,係方塊世界內既小島「カクコロ島」探險,以及收服唔同既精靈黎組成自己既探險小隊。

 

遊戲內玩家係探險途中將會獲得物品,利用呢啲物品可以製作料理,只要烹調精靈鐘意既料理,就可以令佢地成為夥伴,當然烹調既香味亦會吸引野生既精靈,大家識點做啦!

另外遊戲內精靈會分為唔同類型,一般黎講需要配置近戰前鋒及遠攻後衛,大家需要留意每隻精靈既特性再組隊。

 

《Pokémon Quest》Switch 版本已於日本 Nintendo eShop 開放免費下載,遊戲支援繁體中文,至於 iOS/Android 版本就要 6月推出,同樣係免費下載。

 

最後一隻新遊戲資料極少,但係官方就話係核心向既 RPG 新作,現處於開發階段,最快 2019年同大家見面,有個知字都好既。

 

五木

動漫電玩宅,極愛金田一系列,擅長動作及策略遊戲

追蹤

更多文章