【E3 2018】濃厚黑澤明味道《Ghost of Tsushima》武士戰鬥片段公開

 

舊年公開概念片段嘅遊戲《GHOST OF TSUSHIMA》,今年首次公開遊玩片段。遊戲以 1274 年「元寇(蒙古襲來)」嘅歷史背景為題材,以日本對馬作為故事舞台,玩家飾演最後一個武士,嘗試獨力對抗蒙古帝國嘅入侵。

今次公開嘅片段中得知,遊戲採用開放式地圖,穿著斗笠嘅主角可以於地圖上騎馬(隻馬叫 Nobu)。遊戲開發商為曾開發《InFamous》系列嘅 Sucker Punch Productions,所以喺畫面表現上有一定保證。

 

 

場景方面極富電影感,視點切入角度同埋環境構成,甚至有幾分黑澤明電影嘅味道,相信開發團隊喺美學呢方面落咗唔少功夫。

 

 

今次公開片段中嘅戰鬥畫面絕對係重頭戲,拔劍時嘅聲音、擊倒敵人時血濺嘅表現、甚至敵人倒下後,仲會補刀保障對方死亡等等設定,都非常用心。除咗傳統武士道戰鬥,玩家亦可以進行跳躍、飛撲等動作,甚至對敵人進行連續刺殺等等。

 

 

遊戲預計將於 2019 年發售,如果你本身對武士道文化或者日本封建時代有濃厚興趣,相信你會好期待呢隻《Ghost of Tsushima》。以下為最新遊玩片段:

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章