【有好感度要素】到底遊戲業界有幾鍾意養牛《Farm Folks》進階版《牧場物語》登場

 

係呀,我知道業界已經好多牧場系經營遊戲,黎緊八月會推出嘅《Little Dragons Cafe》就係一例;但係偏偏呢種經營遊戲又成日玩唔厭(笑)

今次同大家介紹呢隻《Farm Folks》同樣地以「模擬牧場」為主題,遊戲由澳洲獨立遊戲工作室 Overgrown 開發,團隊亦不違言係以一代《牧場物語》作為靈感,希望做出一隻融合現代 3D 技術、但係同時可以回歸《牧場物語》初心同原點嘅模擬遊戲,務求要玩家玩得開心又窩心咁話!

遊戲故事係講一對兄妹冒險家(玩家可以自己揀性別)原本坐船出海探險,點知遇上暴風而流落小島 Softshoal 上面。喺未搵到方法返屋企之前,身為冒險家嘅主角都要生活架,於是就決定喺小島上面搞基本建設,共創美好生活~

 

 

遊戲中可以進行農作、牧養、釣魚等基本操作,淨係農作物已經有 50 種以上選擇,玩家要注意土地施肥、按時淋水;養牛養雞就要定時餵食,不過,當見到官方話要「抱住愛去養佢地喔!」我就有少少心寒,喂,佢地咁得意養出真感情,你到時叫我點樣庖丁解牛換成糧食呀……

除咗以上玩法,玩家亦需要出外探索地圖去搵資源同素材去強化自己嘅居所同埋道具,淨係呢一點都知道有排玩了,又要斬樹、又要搵石材,睇黎都係一個中毒性極高的遊戲啊~

 

仲有鍛材嘅元素可以玩~

 

本文題目中亦提到,Game 裡面有「好感度」要素的,遊戲中可以進行交流嘅 NPC 一共超過 30 位,同佢地打好關係對你生活亦都有幫助,增加好感度嘅方汰,包括日常交談,亦可以接支線幫佢地解決煩惱;同埋遊戲中係允許同性相吸的,就算你係女玩家,去同個女性 NPC 打好關係嘅話甚至可以上演百合 Play 喔!LOL

 

遊戲中仲有氣候變化,會影響你嘅養牧以及收成作業。

 

而家遊戲仲喺 Kickstarter 度集資緊,如果大家對遊戲有興趣又想快啲玩到嘅,不妨考慮支持下!工作室目標係 2019 年將遊戲登錄 PC 先,如果反應好就會考慮加推 PS4 或 Switch 等 Console 機。

最後比條 Trailer 大家睇下先~

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章