有玩過《Persona 5（女神異聞錄 5）》嘅朋友，唔知你會唔會同我一樣有少少戀父好鬼鍾意「佐倉惣治郎」呢個角色？鐵漢柔情嘅佐倉大叔，唔止沖得一手好咖啡，佢特製嘅「盧布朗咖哩」更加係隔住個 Mon 都覺得好食！

係咪好食先！

隨住《P5》推出埋動畫版，作品嘅人氣自 2016 年到而家都仲係無停過，咁當然相關周邊亦都係不斷咁推出緊（我舊年去東京遊戲展都忍唔住大量課金比 SEGA……），而剛剛喺 AbemaTV 放送完畢嘅特番「PERSONA5 the Animation 純喫茶ルブラン屋根裏放送局」就宣佈「盧布朗咖哩」即將商品化推出！

兩種咖哩分別為「ルブランカレー（盧布朗咖哩）（中辛）」以及「雨宮蓮が作ったルブランカレー（男主角版盧布朗咖哩）（激辛）」

「ルブランカレー（盧布朗咖哩）（中辛）」呢個包裝好《P5》好想要！！

「雨宮蓮が作ったルブランカレー（男主角版盧布朗咖哩）（激辛）」

隨咖哩包仲會附上佐倉惣治郎嘅食譜，想知內容係乜就要自己買啦～

實物烹飪圖

畢竟咖哩絕對係《P5》入面嘅重要回憶之一，所以作品一眾聲優亦都喺節目上面一齊試整盧布朗咖哩……如果由零整起嘅話，都真係需要相當多材料！我真心相信官方拍呢段節目係要話比一眾 Fans 知「喂你唔買我地現成個咖哩包，就要有咁多料先整到個咖哩架啦～仲唔黎課金～」咁樣嘅意思（笑）

兩個咖哩包售價各為 ￥1,200（稅入），8 月 5 日網上預售開始，有興趣嘅朋友可以參考以下網址：

【P5 咖哩預購傳送門】