【新作介紹】推出九年仍然強勢 PS4版《Border Break》絕對好玩唔會悶

早幾日係日服 PSN 推出咗一隻「新」作,因為呢隻作品其實係街機已經推出咗有成九年,直到 8月 2 日先正式係登錄 PS4。講緊既就係擁有極多 Fans 既《Border Break》,到底呢隻遊戲有乜魅力可以令佢係競爭強烈既日本街機市場生存咁耐呢?又到底點解一隻有咁多 Fans 既 Game 會比人話好「悶」呢?

 

首先呢隻遊戲係機械人「Blast Runner」高速對戰遊戲,基本對戰人數為 10 vs 10,而佢係屬於 FPS 遊戲,地圖中會設有可佔領據點、秘道等等,目標係擊破的軍基地核心。

當然亦有唔少制高點

 

遊戲內既機體主要分為「強襲」(Assault)、「重火力」(Heavy)、「游擊」(Scout)、「支援」(Support)四種類,各自有對應既兵裝及能力。每次出擊玩家都可以自由裝備某套兵裝進入戰場。隨住玩家等級上又或者抽逐步解禁各種裝備。而「Blast Runner」則由「頭部」、「胴體」、「腕部」、「腳部」四部份組成,每件裝甲都有多項數值,影響機體性能。

 

而本作最吸引人其中一點就在於玩家可以完全組合自己既「Blast Runner」以及自訂武裝。雖然《Border Break》黎到 PS4 遊戲採用基本免費課金制,但並唔會話你無課金無三星裝就會比人完爆,如果你見到某 Game 評咁講的話,九成九係自己玩唔掂比人虐完,然後就話隻 Game 悶。

我都未課金架!

 

係《Border Break》入面,並無最強既武裝,只有最強既技術、戰術。因為即使係初始武器都唔代表唔好用,例如三星榴彈砲雖然有強大威力,但係得一粒彈而且上彈時間極耐;相反一星版本數雖然威力較低,但係接近可以長時間連發(配合特定技巧)。而近戰既刀除咗基本既直斬、橫斬、斜斬等分別,仲有衝斬、二段斬等等。所以係呢隻遊戲入面,只有最適合自己既兵裝,並無最強。(後期有埋武器屬性就更複雜)所以會話比人屈裝備,又或者聲稱自己用二星裝已經可以無雙既,一係就真係技術勁到爆,一係就以為自己玩緊劣質手機 Game。

點砌自己部機係完全隨意

機師亦到可以習得相應技能

瘋狂擊破敵人既感覺真係好爽!

 

現時遊戲只有非常前期既「第3採掘島」,呢個地圖比較少祕道,主打中場對抗、潛入等,算係比大家熟悉遊戲既操作以及操練自己技術。雖然大家係其他 FPS 遊戲練返黎既技術係《Border Break》內都有用(例如槍法、走位等),不過要注意本作仲要留意 Boost 量既控制、情報掌握等等,所以大家都係要花時間練習、死返咁上下次數先啦!

唔係一味向前衝就得,都要時時留意住戰場資訊,有需要就返基地協防

 

《Border Break》以一隻九年前既作品黎講,絕無過時之感,相反黎到 PS4 除咗令老玩家重拾當年感覺之外,亦都實現到無分地區 10 vs 10 極低網路延遲,課金度比起街機年代大大減低,仲要免費下載有得玩,認真絕對要一試!

話就話要課金,但係我而家都係用緊免費裝

 

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章