【遊戲感想】《OCTOPATH TRAVELER 八方旅人》故事平淡但當中有你~實而不華 2018 佳作之一

 

推出初期一時鋒頭無兩、喺歐美日本等地實體版賣到斷哂貨、然後到而家都無聲氣要推出中文版 Patch,令唔少香港堅持玩本土語言嘅玩家恨得牙癢癢嘅《OCTOPATH TRAVELER 八方旅人》……Sorry,前言好長,總之,今日我終於有時間寫佢嘅遊戲感想鳥!

之所以拖到今日,一來因為遊戲篇幅好長,二來我忙,所以我寧願而家先寫,我係唔會容許自己玩左 3 個鐘都唔知有無嘅 Free Demo ,就當自己已經打爆機寫 Review。我嬲呀,真係當讀者傻架喎,尊重下自己,尊重下個遊戲啦 O_Q

有關遊戲嘅玩法同埋賣點,喺遊戲剛剛公佈時我都不時寫文吹奏,既然期待咁高,我喺剛剛拎到遊戲嘅時候,其實都有淆淆地,到底會唔會期望越大失望越大……

結果係。我玩得好滿足。好開心。《八方》係我今年目前繼《Detroit》之後,第二隻玩完,個心會冒起一句「能夠玩到咁好嘅遊戲,我好感恩」嘅 Game,鍾意到明明做野好忙,都屎忽痕整左兩篇好似無咩用攻略出黎(喂)

遊戲地圖非常大,除咗城鎮,亦有唔少 Hidden Boss 以及大量支線任務,係一隻設定上非常傳統嘅 RPG(其實都幾串,用 Unreal Engine 4 黎整一個復古 Pixel 風嘅遊戲……)

 

地圖很大,好彩城鎮去過一次就可以 Fast Travel,好貼心~

 

角色升 Level 要用嘅經驗值數量算好合理,至少唔會令玩家升級升到悶:因為升 Level 係遊戲中好必要嘅部份黎架,就算你戰鬥技術再高,唔夠血好容易會比怪秒,越級越太多真係會出事的;例如我 20 lv 時走去挑機打 40 lv 嘅怪,真係彈指間灰飛煙滅左都唔知咩事。

角色主線故事嘅戰鬥都算輕鬆易過,反而開副職嗰幾場 Boss 戰就幾有挑戰性,例如魔術師、武芸家呢一堆,一來我又自己衰,Lv 差好多就走去挑機,結果死左兩次之後都係返出去秘密練功算。

 

主線方面嘅 Boss 大多唔算難打,不過開副職嗰啲守護神、同埋隱藏大佬們就幾有挑戰性

 

遊戲入面共八個角色,每個角色都係獨立故事,而每個故事就各分為四個章節,所以淨係主線都真係好耐玩,都未計 N 咁多個支線任務!唔怪得官方之前講到明「唔駛出 DLC 個 Game 都夠豐富」,呢句真呀,遊戲份量絕對貨真價實。

不過,呢個設定就有好有唔好啦,因為遊戲並無強制玩家進行故事章節嘅次序,所以我一開始係玩左自己鍾意嘅角色路線先,即係例如 Cyrus 學者哥哥(心)

 

好想叫佢一聲老師或者前輩(心)

Tressa 嘅故事設定好少女漫畫 LOL

Primrose 嘅故事其實好真實 LOL

 

但係,八個角色入面,仲有一啲角色,你玩得唔係好順手,或者覺得佢個故事唔係好啱口味,自自然然就……被放入冷宮。強調:係我自己唔鍾意啫,無話佢有咩唔好~LOL

戰鬥系統簡單易上手,破防敵人就可以進行弱點攻擊,善用 Boost 仲可以加強效力,如果錢多嘅朋友,場上又有「商人」職業嘅同伴,仲可以用錢請古兵黎幫手打,仲要幾大力下,第一次用時我都笑左出聲:果然有錢駛得鬼推磨!LOL

雖然好多人會覺得「舊式 RPG 成日要磨怪升 level 真係好悶」,不過玩《八方》時我又唔係好覺得辛苦,一來升級算快,二來,戰鬥裡面同場四位角色,各自技能都唔同,有武藝、魔法、屬性、各式輔助技,而敵人嘅弱點都需要玩家留神;所以,直至遊戲中盤時嘅戰鬥都有佢嘅樂趣喺度,因為你會不斷試用唔同嘅攻擊配搭。

至於遊戲後期……相信大家最少都 45 lv,直接去試下挑機打地域 Boss 罷啦~

 

例如佢……我真係好唔鍾意成日要單拖挑人機 orz

 

當然我盡可能都唔想劇透,因為我知道好多玩家仲等緊遊戲中文化嘅一日,所以而家就把故事說穿似乎不太好,若要簡單說明,只能講八條故事線可以話並無關聯,只不過喺同一片大陸上面發生;所以《八方》並唔係啲咩令人「嘩」一聲嘅劃時代驚世劇本,而係淡淡然地訴說「每個人有不同的故事」:八人因為各自的旅行而聚頭,到故事完結,就回到各自的地方去,萍水相逢,淡淡交會過,各不留下印。

「旅人」嘅意思或者亦有如此一樣含意吧。

不過,我原本都期待八位旅人之間會有更多互動交流、亦有以為每人劇情中會有選項、從而影響另一個人嘅路線,結果以上元素都係無的,遊戲絕對係一條直路到終點,完全無 Square Enix 一向嘅扭曲作風(喂)所以到我爆機之時,感覺反而有啲唔太真實。

因為遊戲好樸實,唔花巧,完全唔 Tricky,我真係老啦,面對咁單純嘅遊戲反而覺得唔慣 /w\

 

旅人們嘅交集就係呢啲小劇場

 

講返啲機能上面嘅野先。畫質方面算係咁,畢竟而家係要重現像素風,所以揀喺 Switch 上面推出真係好明智,因為就算隻 Game 再好玩,如果《八方》落 PS4 然後有人用 Pro 機黎玩,應該只會收黎一堆「畫面唔得」嘅評價……LOL

但我並唔係話緊遊戲畫面唔用心架,遊戲喺啲細節位,例如光折射、水倒映等地方,遊戲都好努力地表現嗰種材質感。

 

 

配樂方面係遊戲中超出色嘅一環,我喺開 Game 第二日,已經忍唔住課金買左隻 Original Soundtrack:

 

 

每個角色、每個地圖都有自己嘅主題曲,例如上面首「学者サイラスのテーマ」,聽落帶有幾分王國出行嘅壯大感,同 Cyrus 本人嘅角色非常配合,本身鍾意聽 Soundtrack 嘅朋友,我強烈推介你入手埋《八方》隻碟,絕對唔會後悔的!

 

 

總括黎講,《八方旅人》同我預期一樣,係一隻非常出色嘅 RPG 小品!雖然角色及劇情並無互動選項,令我有些許期待落空,不過,無論係劇情同埋系統,我都搵唔到明顯不滿嘅地方,喂呀,雞蛋裡挑骨頭就無意思啦。

當然啦,呢隻點都係 RPG,而玩 RPG 就一定要煲、要花時間,如果你一向傾向玩即時戰鬥遊戲嘅,唔緊要,出返去玩《Border Break》;但如果你唔介意花時間自己靜靜地一個人打機,呢隻《八方雲集》……Sorry 比我搞最後一次呢個 Gag,我意思係《八方旅人》,喺今年目前已經推出市面嘅幾隻日本 RPG 作品黎講(我唔開名 LOL),絕對係格外出色嘅佳作。

2018 Top Ten 遊戲 from 我,一定會有佢份。
多謝你睇到呢度,如果呢篇短短的感想,能夠引起你在遊戲中片刻共鳴、或者掀起你一點興趣,咁都係我嘅榮幸:)

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻! https://www.facebook.com/katechengyk

追蹤

Facebook 更多文章