YouTube Gaming 成績驕人 但官方已宣布即將面臨停用命運

近呢幾年不論遊戲直播主持又或者係電競比賽,各自都有非常大既觀眾群,呢點各大直播 / 影片平台絕對功不可沒,當中最為人所熟悉既絕對係「Twitch」。係呢個平台經常性產生咗唔少知名既遊戲直播主持,近年最勁既相信就係玩《Fortnite》既 Ninja。而呢類遊戲直播主持又會帶返更多及穩定既觀眾群,形成互利關係。呢種咁成功既模式當然引黎其他商家既注意,所以 YouTube 係 2015 年既時候正式推出「YouTube Gaming」,同「Twitch」一較高下,不過最新既消息係「YouTube Gaming」將面臨停用命運。

 

 

「YouTube Gaming」係 2015 年推出,除咗有自己專屬網站之外仲有專門 App。上面提到既遊戲直播主持 Ninja 雖然係「Twitch」上面爆紅,但係佢係 YouTube 上面既頻道訂閱人數都超越 1800萬,YouTube 都話佢係「史上成長最快既創作者」。而且「YouTube Gaming」既成績一直都唔錯,根據「YouTube Gaming」最高負責人 Ryan Watt 係 Twitter 上面透露:「係過去一年裡面,每日都有平均 2 億位用戶係 YouTube 上面睇遊戲相關內容,總數接近 500 億小時,係遊戲類別於 YouTube 上最強大既一年。」,數字就非常理想,但係呢個咁龐大既數字並無為 YouTube 帶黎相應合乎比例既利潤,而且係 9月 iPhone 既下載排名最低時已跌出 200名。

 

 

相比起 YouTube 主網,「YouTube Gaming」做咗唔少改動,務求吸引更多人使用。但係如果我以用家角度黎講,感覺就非常一般。首頁既影片好似隨機放出黎,非常無一致性,而遊戲分頁感覺亦唔討好,種類亦比較少。而且 Ryan 亦都向外媒 The Verge 講:「大多數人都唔知道個 App 係做乜,以及提供緊乜內容」,又幾老實。

 

我就唔係幾鐘意個版面

 

雖然明年 3 月「YouTube Gaming」就會正式停用(詳見),但係 Google 又點會咁輕易放棄呢個有龐大觀察群既範疇。佢地將會利用 YouTube 既「遊戲頻道」(youtube.com/gaming)繼續吸納呢班觀察,而且截至現時為止已經有 7895 萬用戶訂閱,亦會提供一啲新計畫好似「Creator on the Rise」咁,去幫助比較少訂閱數量既遊戲內容提供者,藉此吸引更多人係 YouTube 創作內容。

 

 

「YouTube Gaming」停用,但係 YouTube Gaming Channel 取而代之,直播 / 影片平台仲會有排打,「Twitch」相信亦唔會束手待斃,絕對會嚴陣以待,務求守住龍頭位置。

五木

動漫電玩宅,極愛金田一系列,擅長動作及策略遊戲

追蹤

更多文章