魔法少女版惡魔城 《Timespinner》蔗渣價錢燒鵝味道

今年橫向動作遊戲市場可以話非常熱鬧,除咗有之前我地力推既《Dead Cell》,又有橫向動作版《Dark Soul》之稱既《Salt and Sanctuary》,早排仲有 Capcom 推出既橫向動作合集《Capcom Belt Action Collection》。而今次介紹呢隻由獨立研發團隊 Lunar Ray Games 開發既《Timespinner》亦都極為高質,橫向動作遊戲 Fans 絕對要留意!

 

 

《Timespinner》故事主要講述女主角 Lunais 既家人被帝國殺害,佢利用神祕機械「Timespinner」得到扭曲時間既力量,踏上對帝國報復既旅程。

遊戲採用 Pixel Art 風格,但係流暢度極高。係《Timespinner》入面,最特別既就係女主角 Lunais 既「Time-Stop」能力。顧名思義,呢個能力係可以令時間停頓,除咗基本令敵人停頓之外,當時間停止時,敵人會呈石化狀態,呢個時候就可以借佢地做踏腳石,去到一啲本身跳唔到上去既地方,又或者係戰鬥中令自己處於更有利位置。

 

本作另一個特點就係「武器」。有別於一般動作遊戲,本作既武器類型只有一種,就係「Orb」(咁主角係魔法少女用呢啲好正常,又唔係講緊魔法少女俺)。透過擊敗 Boss、完成支線等等方式就可以得到,而每種「Orb」都分別包含近戰攻擊、魔法攻擊同埋被動技能三種唔同既功能。而主角可以同時裝備二粒「Orb」,要點配合唔同類型既技能係本作一大魅力。

 

  

 

 

每種「Orb」賦予既攻擊方式都不盡相同,下面為近戰攻擊演示

 

魔法攻擊亦都有極多種類,不過要注意使用魔法攻擊會扣 MP,而 MP隨時間經過會慢慢回復。

 

《Timespinner》除咗基本單人故事模式外,仲可以同一位朋友進行合作模式,遊戲已經於 9 月 25 日正式推出,分別對應 PS4 / PS Vita / Steam / Mac / Linux,售價仲要極平,PS4 / PS Vita USD $19.99,Steam HKD $89.00,抵到爛。

 

《Timespinner》Steam 傳送門

 

滅盡殺手

滅盡殺手 重度魔物獵人中毒者,歷代遊玩時間破億分鐘!

追蹤

更多文章