【真人真事改篇】無反擊之力!第一視點恐怖遊戲《Maid of Sker》只能靠聽覺逃走

 

真人真事改篇嘅恐怖片大家就睇得多,真人真事改篇嘅恐怖 Game 唔知你地又有無興趣呢?

英國遊戲工作室 Wales Interactive 剛剛就宣佈,佢地即將推出全新作品《Maid of Sker》,佢係一隻驚慄系求生遊戲,預計 2019 年秋季上市,全平台登錄(PS4、Switch、XBox One 及 Steam),好似仲會對應埋 PSVR 添。

玩家飾演嘅主人翁 Thomas Evans 係一位聽覺靈敏嘅音樂家,你心愛嘅女主角 Elizabeth Williams 居住於一間名為 Sker House 嘅大宅,有一日你發現聯絡唔到 Elizabeth,咁就膽粗粗去搵佢,點知發現呢間 Sker House 非常唔對路……

 

 

《Maid of Sker》遊戲玩法同《Outlast》有啲類似,玩家並無任何武器或攻擊力,面對住修道院入面一連串遇到嘅惡夢同怪事,甚至係不明物體嘅攻擊或者追捕,你可以做嘅,就只有匿埋,或者走佬。頭先咪話你係一個音樂家所以對耳好靈敏嘅?無錯!呢對耳仔就係你唯一保護自己嘅工具,你要聽,聽啲聲喺邊度黎。

既然係玩聲,呢個遊戲喺聲效上自然落足功夫,做到 360 度有層次環迴立體聲咁話!強烈推薦大家戴耳機玩 LOL

 

呢啲只係修道院表面見到嘅形象,但係你好快就會見到佢真正嘅另一面…

 

但係,其實你嘅「敵人」亦都聽覺好敏銳,所以,如果你動作太大,或者因為驚而有急促透氣聲,佢地都係會對你進行攻擊的。呢個遊戲仲要以第一視點進行,相信比較細膽嘅玩家,一定會緊張到想掟手制!

 

真嘅一面係咁 : (

 

順帶一提,遊戲中提到的 Sker House 係真實存在的,佢係一間位於英國 Wales 具有超過 900 年歷史嘅修道院,亦係當地出名嘅鬼屋。至於遊戲主角 Thomas Evans 以及 Elizabeth Williams,兩人亦都係真實存在的人物,Thomas 為一個名不經傳的詩人及音樂家,而 Elizabeth 就係當地富有農戶的女兒,因為身份階級問題,佢地嘅戀情就被女方家人反對。佢地嘅故事喺當地非常著名,有民謠,亦有小說。

今次嘅遊戲,當然亦係以兩人嘅故事作為藍本,至於間屋係咪真係有鬼?我點知啫,你地玩完咪知囉 LOL

我認我淆底,寫完呢篇介紹之後,我都幾肯定我唔會夠膽開黎玩,第一視點仲要《Outlast》式無助逃亡 Play,我一定駕馭唔到,都係留比你地一眾勇者挑戰罷啦(哭)

最後送上 Trailer。
頭先唔記得講,遊戲對應 4K,PS4 Pro 的玩家有福了(心)

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章