今次嘅《宇宙戰隊九連者 x 幪面超人Build劇場版》係將《宇宙戰隊九連者 THE MOVIE 蓋斯因達貝的逆襲》同《劇場版 幪面超人Build Be The One》合併成一套電影上映，所以一張戲飛就可以睇曬兩套電影喇~ 首先播映嘅係《宇宙戰隊九連者 THE MOVIE 蓋斯因達貝的逆襲》!

《宇宙戰隊九連者 THE MOVIE 蓋斯因達貝的逆襲》
繼《星獸戰隊銀河人》後再度以宇宙為主題嘅《宇宙戰隊九連者》，今套劇場版確實完全體現其宇宙元素，只有一場戲係發生係地球～

故事講述宇宙戰隊九連者要阻止巨大的敵人侵襲，必須集齊散落在宇宙的三枚擁有不可思議力量的石頭，去左三個唔同嘅星球（ハスキー、ブル、ドーベル，偷偷話你知三個星球名其實係來自三種犬隻：哈士奇、鬥牛犬、杜賓犬）咁究竟成唔成功，就要入場睇先知喇～

講返今次劇場版屬於《宇宙戰隊九連者》獨立劇場版，今次嘅劇場版機械人都係好有心機，打鬥方面亦有一貫戰隊風格，當中11人一齊變身唱名，係大銀幕上亦格外令人熱血沸騰！就算無睇TV版都唔會對故事會有不明白嘅地方，加上以粵語配音，小朋友都一定睇得開心。但係可能因為係粵語配音，未有加上字幕可能會睇得有啲唔習慣。

究極救世主 宇宙戰隊九連者

播放完《宇宙戰隊九連者 THE MOVIE 蓋斯因達貝的逆襲》就到我最中意嘅《劇場版 幪面超人Build Be The One》

《劇場版 幪面超人Build Be The One》

電影一開始以葛城巧一段記憶為開端，以插敘方式述說主角桐生戰兔心路歷程，如何係失去伙伴萬丈龍我繼續振作，從最壞嘅情況下搵出勝利嘅法則！成套電影保留左TV版嘅幽默感同嚴肅，可以睇到猿渡一海(幪面超人Grease)同冰室幻德(幪面超人Rogue)男人之間友情同可愛嘅鬥咀～但劇情上推進有些少急趕，沒有交代太多細節，反派描述亦略嫌粗略，唔夠立體，整體上不過不失。

後：桐生戰兔(幪面超人Build)／萬丈龍我(幪面超人Cross-Z)   前：猿渡一海(幪面超人Grease)／冰室幻德(幪面超人Rogue)

電影中有好多鏡頭以航拍拍攝，亦有特別的剪接令追逐戰更緊張，動作場面更有張力。而且活用慢鏡或只用聲效去突顯某些場景，令成套戲係角色處理上比起特攝更接近電影嘅處理手法。另外，劇場版形態Cross-ZBuild 係繼《幪面超人W》後再次出現由二人共同變身成一體嘅幪面超人，係呢套劇場版嘅亮點黎！

幪面超人Blood及幪面超人Build Genius Form

幪面超人Cross-ZBuild

最後，提提大家，記得留到最後先好走，有驚喜架！

下一套嘅幪面超人劇場版電影《幪面超人 平成Generations FOREVER》亦將於2019年係香港上映。