【自己識彈!】專業還原鋼琴原理 LEGO拼砌三角琴

2014 年嘅 LEGO Ideas 第三輪選,我地除左見到 JKBrickworks 成功令佢嘅 Labyrinth Marble Maze 量產成 21305 LEGO Maze,亦係首次見到有樂器作品入到輪選階段(Piano by Hidaka),咁最後無法量產落選而回啦。

不過返期喺 LEGO Ideas 作品圈入面,出現左件超爆炸性作品,同樣係鋼琴,不過未夠一個月就已經拎左近半萬嘅支持票數。隆重為大家介紹,由生活喺澳洲墨爾本嘅華人 Donny Chen 用超過二千七百塊所製作而成,人手彈得又或可以電動自己彈嘅 Playable Lego Piano

Playable Lego Piano By Donny Chen aka SleepyCow

先講返 Donny,佢除左本身讀音樂、教鋼琴,同時係一位鋼琴調音師。喺教學上經常比學生問到鋼琴嘅原理,佢就認為既然咁多人想問想知,不如去製作一個同真實鋼琴原理一樣嘅 LEGO 鋼琴,咁可以以呢個方法去令大眾都可以喺建構過程學得到。

Size 大約同外觀上的確同真實三角琴無異,就連鋼琴椅都同真嘅一樣,扭側邊都調教高低

踏板亦唔係裝飾,撳落去真係有反應架

打開埋個琴睇睇啦,半開或者全開琴蓋都冇問題

譜架又點少得

對比真實鋼琴88個鍵,Playable Lego Piano雖然總共得25個鍵,但已經係兩個8度加一個白鍵

琴鍵蓋同琴鍵組都可以輕易拆出嚟去睇佢嘅結構同運作

弦列位置同擺位都係跟足實物去做

可以自己彈奏,就全靠收埋嘅呢組Power Function,而且仲有三種快慢調校彈奏速度

講左咁多咁複雜嘅結構,但 Donny 話最頭痛嘅位竟然係琴鍵蓋嘅一個小小動作。原來琴鍵蓋係有一個小小嘅機關,當唔小心碰撞到嘅情況下,琴鍵蓋都會只係緩降,唔會令到彈奏者受傷。

說到尾 Playable Lego Piano 連自動彈奏都做得到,不過限於 LEGO 組件嘅情況下,暫時係無辨法彈得出聲。不過雖然係咁,但 Donny 都講過如果換成鋼線或魚絲去代替 LEGO 嘅繩線,理論上係可以。而佢亦開始著手去改良,主要去再簡化組件使用量,並且嘗試發聲嘅可能性。

Playable Lego Piano 係一個以教學為目標嘅作品,老實講唔係咁仔細我都唔知一個鋼琴嘅結構原來係咁複雜。雖然已經有半萬嘅票數,但 Donny 都希望趕得切搭得到 2019 年第一季輪選嘅尾班車,而呢個目標就要靠大家未去 LEGO Ideas 比支持嘅大家幫幫手啦!

Donny Chen Playable Lego Piano LEGO Ideas 傳送門

阿九

阿九 打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enought! Lego Enthusiast https://goo.gl/HRnxDW

追蹤

更多文章