【讀者投稿】《Let’s go》一款為咗「新手老手同樂」嘅Pokemon

《Pokemon Let’s Go》作為第一款登錄NS嘅作品,亦係增田順一事隔5年自XY後再度參與嘅Pokemon作品,即使已表明佢並唔係正傳,亦足以讓一眾老玩家以引頸以待;當然,並唔少得一班於《Go》中尋回熱枕嘅玩家。

 

 

遊戲我就已經通關(雖然未打晒各個寶可夢大師),宣傳片中嘅小藍過場動畫亦已經睇咗。我覺得,如果我哋抱住以往對PKM系列對戰嘅技巧、數據等一一考究嘅繃緊態度,將無辦法好好理解同享受《Let’s Go》嘅存在。只需要數下對戰系統變動上嘅「PKM無特性/道具」、「招式數量大幅減少」、「較為戰術型招式除去」、「覺醒值上限太高」等,都足以將之棄如敞履。但現今網絡咁方便,我哋只要走一轉不同嘅討論區,就會見到相當多嘅完全新手或《Go》轉過來嘅新手,正喺度詢問一啲有關對戰或育成嘅問題。所以我覺得本作一隻足以「讓老手與新手同樂」嘅PKM遊戲。

 

 

回想起《Pokemon》嘅第一作《赤》、《綠》已經係一九九六年嘅事,而《Let’s Go》所復刻嘅《黃》都已經係九八年嘅事,足足二十年。二十年嘅時間,遊戲一路一路精進,愈係精彩嘅對戰,就愈係令新手難以入門。或者係見到呢個情況,所以《Let’s Go》就用返大家最為熟悉嘅內容-初代並最接近動畫版本嘅內容-配以最為精簡下嘅遊戲;門檻置於「只要想,就可以同樂」嘅低水平。

 

 

咁交待完本文章視角,我哋就由本遊戲嘅細部慢慢去睇下優缺。

 

本作野生戰全面變成郊野公園;即係《GO》形式嘅非戰鬥齋投球。就呢點上,其實問題唔算好大,因為其實整體遊戲難度都為咗呢點而有所遷就;再者,對於《Go》嘅玩家來講,應該更有親切感。同以往正傳比較,本作升級對比起與NPC對戰,捕捉嘅效益會更高,隨住各式各樣嘅經驗值疊加效果,捕捉嘅經驗值足以讓玩家絕對唔會落後於遊戲進度所需。以捉為主,對戰為次嘅格調,即使係經驗值升級上都相當明顯。更甚者,就連個體值多V及色違嘅出現條件,更自《日、月》嘅「呼叫連鎖」進一步變成「捕捉連鎖」。無論你係為咗通關,抑或係有「完美傾向」,大家都無辦法離開「捕捉」呢個主軸;單就投球捕捉呢點上,即使係新手都能夠好快理解,而對多V有偏好嘅老手們,亦會花時間去深入理解;例如咩21連鎖保3V、31連鎖後保4V、色違31連鎖後機率為1/1024等。呢啲只需要重覆最簡單嘅步驟就可以學到嘅技巧,所花嘅耐心,某程度上我覺得同「正傳生蛋生幾日」差唔多,亦都係某種「PKM愛」嘅表現。

 

 

講完郊野公園制嘅優點,我都略略講係缺點-或者應該係話我無玩太多時間落去「捕捉連鎖」上嘅原因:如果我打算下年買正傳,我會選擇到時捉3V配紅線生蛋,要產出5V及6V都唔洗等嗰個1/1024嘅機會率;更加唔好提《日月》係有個體值強化機制。要認真追求「完美」的話,所花嘅精神及耐性甚至比正傳高。如果我無玩過正傳,係一個「正傳新手」的話,我係唔會介意花啲時間去捉嘅;「正傳新手」發現遊戲有趣,並為明年正傳作準備嘅節奏。

 

 

道館新增入場條件。雖然除咗第一道館有特別嘅「持有水或草屬性寶可夢」外,其他都係以等級作為條件,但單單從第一道館所畀出嘅提示可見,呢個入場條件其實係預防玩家卡關所設嘅。以往正傳由於野外戰經驗值低,對戰NPC數目有限,適度卡等,輸幾場並無傷大雅。但喺本作就唔同,如果輸咗會扣錢的話,對遊戲會構成好大嘅障礙;因為要升級就要捕捉PKM,捕捉PKM係要精靈球,精靈球係要錢嘅。由此,為每個道館設置條件,將有助玩家免於連續失敗嘅挫折,亦免於遊戲難以進行。雖然偶爾有啲遊戲直播主都仍然會大叫「點解電唔到隻小拳石嘅」,不過,相信各位聰明嘅玩家都唔會唔明「持有水或草屬性寶可夢」呢個條件其實係咩意思。

 

 

不過,話雖如此,對於「持有水或草屬性寶可夢」呢個提示,我係有些微意見。小剛嘅道館所宣稱嘅係岩石屬性道館,剋制岩石屬性嘅有水、草、鋼、格、地,足足五個屬性之多,並唔侷限於水、草兩個屬性。無疑,對付小剛兩隻同時具備岩石及地面屬性嘅小拳石同大岩蛇,水或草能夠打出四倍傷害係最強;但會唔會令到新手養成誤解同壞習慣呢?我就不得而知。(你知啦,唔係好多人會去睇一次屬性表⋯例如上面講嘅電唔到小拳石)

 

 

另外今集既然係重製,將老玩家嘅二十年前嘅童年回憶,各道館及劇情中都加入過場,讓角色郁住來講故事,係既親切又新鮮嘅-仲有神穩多年嘅小藍粉墨登場呢。就畫面上嘅感覺,我就覺得甚至比《日月》更為成熟,而且足以表達PKM所需嘅可愛。

 

 

如果要攞正傳比,《Let’s Go》無論對戰抑或育成方面,都係拍馬追唔上嘅情況。如果想從《Let’s Go》享受到PKM系列如捉棋般,「考先讀」、「講組合」嘅對戰,係唔可能嘅,因為變數同所需嘅考量都太少;育成方面亦會因為「無遺傳招式」、「無生蛋」、「覺醒值影響過大」而令到玩家只可能喺《Let’s Go》得到好好嘅原石-絕非成品。

單論收集,本作未必比得上《Go》。本作侷限咗喺1至151號嘅Pokemon上,而且《Go》傳過去嘅Pokemon係無法傳返轉頭。而且本作亦唔會有同朋友或盟友一齊打團隊戰、社團日一般熱鬧多人。

雖然本作從兩邊睇都係中途半端,但正正係因為中途半端,《Let’s Go》具有正傳近年所缺嘅低入門門檻,亦具有《GO》所缺嘅育成或戰鬥技巧。會因本作而投入下年正傳嘅玩家可能未必好多,老手緬懷一下童年後可能就唔會放太多心力落去;但就如我文首所講,我哋就喺呢次嘅中途半端中「同樂」。

 

 

古渡

《Pokemon XY》400小時遊玩時間,天梯賽1700以上嘅非專業玩家。閒時會寫下嘢咁

追蹤

更多文章