【遊戲感想】對唔住我一直話你係道具無雙《Spider-Man》第二個 DLC《Turf Wars》難度暴增!

 

由正傳《Spider-Man》去到第一個 DLC《The Heist》,就算遊戲難度設為困難,我都一直認為呢個遊戲難度一般,基本上係道具無雙。

黎到第二個 DLC《Turf Wars》,對唔住,我跪,Sorry。我要收返「道具無雙」呢個形容詞,因為今次呢個 DLC 激戰連場,先唔講主線劇情,連據點戰都極難打,一共 5 Wave 嘅據點戰簡直係玩到我懷疑人生!

 

 

或者係因為之前我一直太輕視《Spider-Man》嘅難度(又或者之前遊戲系統真係將難度 Set 得太易),黎到《Turf Wars》我總算有一種「亂世英雄不易當」嘅感覺,啲 Hammerhead 個個都拎住銀貂啲變態軍備所以極重火力,一堆 Laser 地圖炮再加光頭大隻仔,仲要加一堆飛黎飛去嘅小混混,打得稍為鬆懈啲都真係會扣你大半血!

平時打犯罪事件咪會有啲 NPC 警察喺度射槍嘅?之前我覺得「你班 NPC 唔好再 Hea 啲?幾十槍都射唔死人」,去到今個 DLC,嗚呀,喺我無血嘅時候真係多謝警察 NPC,全靠你地啲豆豆槍幫我打斷啲 Hammerhead 嘅攻擊,我先可以有一秒回氣空間 orz

 

 

<以下劇透注意>

 

前個 DLC《The Heist》因為有黑貓幫拖,加上談情說愛(?)成份極重,所以基本上係無痛通關;不過《Turf Wars》嘅劇本相對黎講就 Heavy 好多,一開場就一堆人領便當,雖然係 NPC 但都係人命吖(無誤)

至於渡邊悠里,呢個 2011 年先喺漫畫裡面登場嘅角色,明明我記得佢除左警察之外,仲有一個身份叫「鬼魂」,正傳遊戲裡面佢一直都只係飾演緊一個盡心盡力嘅差婆、一個 Spider-Man 嘅理解者,我原本仲以為喺呢個遊戲入面唔會睇到佢黑化嘅劇情。

 

 

結果,我錯了。

悠里睇著自己啲手足一班接一班咁比 Hammerhead 視人命如草芥咁殺死,內心嗰道悲憤終於將佢旋漸變黑、得咗!雖然而家佢未至於話同 Peter 敵對,但係去到劇情最後部份,悠里走去 KO Hammerhead 嗰一幕嘅氣場同埋表情,真係睇到我淆一淆。

 

 

比較令我欣慰嘅係:今次終於唔駛用 MJ!唔駛用 MJ!唔駛用 MJ!很重要所以說三次!面對住呢班殺人如麻嘅痴線佬,如果劇情仲係安排 MJ 一個走去玩勇武潛入嘅話,我先會覺得安排呢種劇情嘅人係痴線(對唔住)。

至於二代蜘蛛俠 Miles 今集雖然無正式出場,但係就經常喺 Peter 打到半死嘅時候打電話黎討拍拍,又話要跟住 Peter 學野咁樣;要知道今集如果你一味衝主線嘅話,真係都幾攰下,所以對住 Miles 呢個小朋友不知世途險惡嘅時候,我真係有一秒覺得呢個後生仔煩過 JJJ……

 

今集 JJJ 一樣咁傲嬌

 

Hammerhead 下一個 DLC 應該會捲土重來、至於黑貓會唔會再出場、以及悠里會以一個咩立場再出現喺故事入面,就請大家同我一齊等待 12 月份最後一隻 DLC 了。作為 DLC 黎講,《The City That Never Sleeps》呢個三部曲我評價是幾高的,無論係劇情篇幅、以至到劇本安排,作為正傳故事嘅延續算係幾過癮,亦都成功留低好多伏線比玩家期得《Spider-Man 2》呢隻續集遊戲。

期待 12 月份!

 

延伸閱讀:

【遊戲感想】非《蜘蛛俠》Fans 表示一玩傾心《SPIDER-MAN》絕對係今年傑出之作!
【遊戲感想】貓有九條命《Spider-Man》黑貓劇本「The Heist」成功令我期待下一個 DLC

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻!

追蹤

Facebook 更多文章