《Dark Souls 3》被刪除內容勁有型 獻祭敵人隨地起篝火

其實不論係大作與否,都總會有被刪走既內容,理由亦都林林總總。例如覺得唔啱遊戲設定、影響平衡度等等,乜類型都有。當中《Dark Souls》系列就不停被人發掘到好多被刪除內容,呢類內容唔少都好有趣。而最近又有人挖到新既被刪內容,原來當初官方曾經設定玩家可以隨地起篝火,個動作仲好有型添!

 

 

日前有位 YouTuber Lance McDonald 如常研究 Alpha 版本《Dark Souls 3》,意外地發現一個情況。當時佢照正常咁劈死啲怪,敵人都正正常常咁死,而且仲有跌寶物。但係奇怪地,Lance 佢無法拾取該物品,不過同時就發現被刪除既互動動作,就係玩家可以拖住敵人周圍走!

 

執唔到野

 

可以拖住條屍周圍走

 

當然就咁拖住周圍行好似無乜特別,但其實呢個動作其實係有意義的。原來呢一種敵人既屍體係可以透過拔劍獻祭動作,插把「儀式劍」(螺旋劍)係佢身上建立篝火,而呢個篝火除咗有一般篝火功能之外(升lv、重點、贖罪等等),仲會令周邊既世界籠罩住一種黑氣,其他玩家就可以入侵種黑色世界進行專門 PvP 戰。

 

 

當然呢個咁有型既儀式並無保留到正式版遊戲,但係相信係遊戲初期「獻祭」呢個元素係佔遊戲非常重要既部份。理由就係當初遊戲係 2015 年 E3 遊戲展揭幕時,Bandai Namco 曾經整咗一隻巨型雕像,當時既造型正正就係「獻祭」並且有黑色液體噴出。不過如果可以容許玩家隨地起篝火的話,似乎會變得無咁「Dark Souls」,雖然「獻祭」真係好有型!

 

當年 E3,留意後面隻野!

 

《Dark Souls 3》已經推出,對應平台為 PlayStation 4 / Xbox One / PC。

五木

五木 動漫電玩宅,極愛金田一系列,擅長動作及策略遊戲

追蹤

更多文章