嚟緊 1 月 3 號喺香港正式公開發售嘅 80101 團圓‧團年飯 Chinese New Year’s Eve Dinner 同埋 80102 舞龍賀歲 Dragon Dance 呢兩套亞洲區別注產品，我地就率先收到團年飯呢 Set 去同大家睇睇佢有幾吸引！
睇相好似冇乜野，實際個盒都超過 50 cm 長
80101 總件數有 616 件，5 大包嘅組件加兩塊 16×16 底板，譜製作書都有成一百二十幾頁
特別一提以往嘅製作書，其實都有下載版，不過小朋友就未必咁易搵到睇到，依家用《LEGO Life》呢個 App 就只要掃一掃 QR Code 就可以輕鬆睇得到
如之前所預計一樣，全家福、電視、揮春等等嘅擺設都係貼紙，咁就代表所有食品都係印刷件啦！
6 個 Minifigures，嫲嫲爺爺、媽媽爸爸、仔仔囡囡三代同堂，當中除左爺爺同媽媽之外都有雙表情，而特別留意嫲嫲兩個表情其實只係眼眉有分別！(老人家喜怒不形於色啊！)
衣著嘅印刷有特色，亦非常細緻
兩個小朋友就當然有利是收添啦！
輪到主建築，外觀上大門真係冇乜挑剔。簡潔同時可改動性相當高，不過記住唔好貼錯個福字嘅方向啊！
兩款唔同砌法嘅紅燈籠
側面咁樣睇就同合院式中國傳統建築非常相似
內裝格局就非常充實
兩組大窗花其實係冇 stud 扣實只係套落去，呢個砌法都係近年先喺官方產品見到
成套 80101 團圓‧團年飯 Chinese New Year’s Eve Dinner 主菜就當然係啲飯餸嘅印件啦！九大簋加兩個甜品(湯丸、年糕)仲要每人一個白飯同餐具(筷子、匙羹)
繼 The LEGO Ninjago Movie Minifigures 配件兩款飯碗，第三款雙金邊嘅就喺 80101 出現
飯枱設計係類似酒樓飲宴嘅有轉盤大枱，當然真係可以轉得！
咁靚咁精緻仲要咁多印件嘅 80101 團圓‧團年飯 Chinese New Year’s Eve Dinner 睇完咁多優點係咪好心動先？不過佢都有啲美中不足嘅地方，但只要大家做好少嘅改動就可以解決得到。
短腳小朋友同媽媽著裙所以坐唔到櫈呢個情況就冇得搞架啦，除非大家選擇幫佢地換腳啦
另一個問題就係喺啲櫈嘅高度上面，櫈底選用 Brick Ø16 W. Cross(614301)，冇放 Minifigure 落去唔覺大問題，但擺左就發現佢對腳直頭放上枱一樣
如果大家同我一樣覺得要改一改佢嘅，就去執 6 件 Plate 2X2 Round (403201)，將個櫈底換左佢，咁就唔會好睇好多
左邊係原設定，右邊係換左新件嘅高度
總結
80101 團圓‧團年飯 Chinese New Year’s Eve Dinner 擺到明以農曆新年做中國主題嘅第一炮，呢個頭算開得穩打穩紮。最值得讚嘅一定係佢嘅食物印刷件以及所有 Minifigures 嘅印刷圖案，加上窗框上用件同配搭，簡單咁做到典型中國建築嘅神緒。就算玩家想將佢由原設版本改成密封式或者娃娃屋嘅額外需求唔多亦唔複雜，而且公佈左嘅售價( 港幣 $559.9 )亦算合理。
不過上文同大家所講嘅一啲美中不足，應該就唔會影響到普通玩家嘅購買意慾。如果係 MOC 創作者就未必會對佢有太大嘅興趣，不竟佢製作嘅方式唔算非常特別 (唯獨係啲傢具用色用件上有啲啲心思)，四四方方嘅格局就算要模仿亦非難事。但係你考慮踏入創作之路，想搵啲東方色彩嘅家居去參照或者改裝，呢套 80101 就絕對啱晒心水！
80101 團圓‧團年飯 Chinese New Year’s Eve Dinner 1 月 3 日起於 LEGO Certified Store、Toys “R” Us 以及各大百貨公司有售。
阿九
打機 - 識少少；玩具 - 識少少；睇戲 - 識少少；動漫 - 識少少.....
買膠、派膠、分享膠！Only The Best Is Good Enough！
Lego Enthusiast //goo.gl/HRnxDW