【年度伏 Game】VJGamer 編輯部 Worst Game of the Year 2018

又到咗一年一度派「遊戲成績表」嘅時候啦!跟返過去慣例,喺講 2018 年有咩好 Game 之前,我地都會先苦後甜咁同各位講下今年有咩伏作,好等大家唔好一時衝動見到「喂特價喎!」就中招,所以,求神科佛時運高,所有遊戲廠商見到呢篇文都要扮見唔到呀 LOL!

當然啦,我地以下嘅遊戲名單只代表 VJGamer 內部(近乎零異議)之下嘅睇法,希望可以作為你嘅參考,又或者引起你嘅共鳴啦~

《Closed Nightmare》

由日本一出品既劇場型恐怖冒險遊戲,主打使用大量寫實影像,彷如電影一樣既呈現手法,令玩家更深咁感受遊戲既恐怖氛圍。表面上好似唔錯咁,但係實際玩落去就知瀨野。不但故事進程其緩慢,畫面表現亦都完全無恐怖感,最大鑊既係遊戲劇情係悶到喊!(我真係玩到訓著)

劇場型恐佈遊戲,既無劇情亦唔恐怖,完全唔知佢存在既意義係乜,不過如果閣下失眠,可以考慮下買呢隻野返去,應該幫到你。

 

 

《真三國無雙 8》

推出以黎受盡各方負皮,如果呢隻 Game 唔上榜應該會比人話做馬。今集首次使用開放式世界,不過效果真係麻麻地。而且遊戲內出現各種類型大大小小既 Bug,亦無過往無雙系列果種爽快感,雖然廠方有努力推出 Patch 去修補問題,不過我就無心機開黎試了。

 

 

《Earthfall》

之前我地有寫過評測既一款伏作。遊戲標榜四人合作、共鬥打喪屍等元素。不過呢隻射擊遊戲既「射擊感」仲薄弱過豬肉紙,打中感覺尤如打紙板公仔。敵人甚至係黎黎去去都係打同一款怪,悶到嘔電。如果想更了解下遊戲表現既,不妨回帶睇睇我地既評測

 

 

《New Gundam Breaker》

又係一隻唔入榜會比人鬧既勁野。雖然 Breaker 系列不嬲都卡卡地,但係對比返新機制,Lag機其實算係好小事。係今集,玩家收集零件之後,需要放去收集箱度先係真正得到該零件,否則只會計算玩家身上所拾得既零件。

但係,每次玩家只能夠拎「五件」零件,導致每場戰鬥玩家主要都係走黎走去放零件,成件事真係非常之咁弱智……仲未計版圖少、零件屬性差異極低等問題,除非真係好想觀賞模型,否則真係唔太建議入(雖然話最近有所改善,不過我地無人有勇氣入去試…)

 

 

《星之卡比》

遊戲推出之前,大家淨睇片都覺得好正;遊戲推出之後,完全無人提,點解?事前影片標榜住可以四人合作,用各種特性通關,的確係好吸引。

不過玩落就發現只有特定地方先需要各種特性,而且畫面極亂,合作性接近零;加上遊戲難度屬弱智級數,更加令人提唔起意欲去玩。當然如果閣下家中有三歲小朋友的話,都可以一戰的。

 

 

《Metal Gear Survive》

借 MGS 之名推出既作品,除咗「不知所謂」之外,我地無人想寫多幾句,錢多想炫富的話就買啦。

 

 

P.S. 至於如果你問點解無《Fallout76》,嗯……隻 Game 唔係未整好架咩?有無勇者一路試哂佢啲 Patch 想分享兩句?