《DOA 6》祕密現身香港 編輯部率先試玩及專訪報告

格鬥遊戲界不嬲除咗百花齊放之外,各大系列仲 Keep 住出新作,歷久不衰。當中又主要分為平面格鬥同立體格鬥二種,平面格鬥既代表當然有《街霸》系列、《拳皇》系列。而立體格鬥遊戲競爭就少啲,自從《Virtual Fighter》無再出之後,市面上就淨返《鐵拳》系列、《劍魂》系列同埋《Dead or Alive》系列,當中個人最鐘意既就係《Dead or Alive》系列。新一代作品推出在即,製作人新堀洋平亦都趁呢個機會黎到香港同一眾傳媒朋友會面,仲有埋試玩添,我地當然要即刻睇下今集有咩咁正啦!

 

新掘洋平先生 COS 住 Bayman 出現

 

先澄清一下一直以黎好多人誤傳既消息,講緊既係好多唔同既報導話今次《Dead or Alive 6》(簡稱DOA6)女角會收起性感,全部衣裝會改為密密實實。以上全屬誤傳,舊有角色衣服全部有得用返之餘,新衫亦有好多唔同風格,而且亦都可以自定義角色衣裝(當然無劍魂咁誇啦),大家可以唔洗擔心啦。

 

睇完幅圖之後,應該無人再有問題啦?

女性玩家同樣有福利,放心

 

週邊野我地唔講太多啦,作為專業既媒體,都係同大家講返格鬥遊戲最主要既系統啦。

今集新增一個新按鈕「S」,呢個按鈕主要有三個用途,分別係「崩解爆擊」、「致命突擊」、「崩解反擊」。

 

第一個用途係「崩解爆擊」(超必殺技),需要用晒成條超必 Bar,使用指令「→+S」。而我地測試時就發現威力認真麻麻,同一 Set 連技傷害分別不大,不過出果陣有一下無視打擊屬性,都叫做有用。

 

 

第二個用途「致命突擊」,類似現時流行既格鬥遊戲簡易連段,只要連按四下就會自動使出威力不俗既連招,不過亦有唔少缺點,我地後面再作說明。

 

 

最後一個「崩解反擊」,需要用一半超必 Bar,使用指令「←+S」。呢招有二種情況可以使用,第一個情況就係敵對玩家攻擊時,只要你使出「崩解反擊」,成功的話就會閃去敵人背後(無需再估上中下段)。另一個情況就係玩家被中致命攻擊連段時,可以消耗一半超必 Bar使出「崩解反擊」,如果敵人繼續連段就會被 Counter,同時玩家會位移去敵人背後。

 

 

其他系統同舊作大同小異,都係會爆衫、轉場景等等。另外今集故事模式會以時間軸型式表達,故事章節選擇位置除咗主線之外,仲會顯示同一個時間點其他角色正在進行既事情,表達方式極為清晰,值得一讚。

 

 

我地試玩完之後,當然要捉住製作人新堀洋平問返幾句啦。

第一條問題我地就問到時下興跑錯棚,黎緊會唔會有機會同其他作品合作,例如同屬光榮作品既《影牢》有無可能現身呢?

 

咁新堀先生就話到其實仲係諗緊既階段,不過相信最有可能係《忍者龍剣伝》系列,畢竟唔少日本玩家都話《DOA》無「紅葉」點得架!(笑)

而初始角色連同特典既女天狗,加埋有成 26 位角色,角色都算幾多,叫做幾有良心。

 

 

跟住我地就問到新系統「致命突擊」既問題,因為現時唔少遊戲都有自動簡易連段呢個系統,雖然係便利唔少新手玩家,但係除咗另新手玩家過份依賴外,仲會有機會令老手覺得「齋撳都扣咁多,垃圾Game!」,此問題係《Dragon Ball Fighter Z》特別嚴重(當然真正識玩既打Ranking最鐘意見到齋撳流)。咁黎到《DOA 6》,又要點樣避免呢個問題呢?

 

新堀先生係呢度就直頭開機實機示範比我地睇啦,首先用「致命突擊」起手係非常之慢,用立P 一般角色都可以輕鬆截擊。另外,如果玩家擋咗「致命突擊」第一擊之後,敵方就無得再撳落去,亦即係會有超長既收手時間。同時,所有既「致命突擊」都屬上段攻擊,只要蹲下就可以輕鬆無視。

當然有玩開《DOA》既朋友相信都同我有同樣問題,用「Hold」制破唔破到?原來「致命突擊」第 1 Hit 係可以用「Hold」制黎破,至於第 2-4 Hit 就要用「崩解反擊」。

 

 

最後我地問到推出後會唔會有持續有更新咁,新堀先生係呢度都好謙虛地話相比起《鐵拳》系列,《DOA》既角色可能無佢地咁為人所熟悉,不過佢地會盡量聽取玩家意見,加入更多新角色及平衡之外,仲會積極考慮同其他作品合作,相信會令玩家滿意。

 

 

《Dead or Alive 6》即日起將會有 Online Beta 比大家試玩,今次雖然叫做 Online Beta,不過主力係壓力測試黎,只會有線上對戰模式。而正式版將會於 3 月 1日推出,對應平台為 PS4 / Xbox One / PC 及街機。

 

森麻

VJGamer總編 (毒撚),歡迎投稿

追蹤

Facebook 更多文章