【遊戲評測】同金城武一樣歷久不衰 《鬼武者》你值得擁有!

近年各大廠商都好努力咁去炒冷飯,當中有做得好有做得差既,例如出到聖劍傳說咁就真係……。不過當中亦都有做得好既例子,近期大熱既《Biohazard RE:2》就係當中既表表者,遊戲接近完全重新製作,各方面都一絲不苟。而另一隻同廠出品既遊戲《鬼武者》其實亦都好優秀,雖然只係 HD Remaster,不過遊戲本身已經非常之優勢,絕對值得向大家推介!

 

 

《鬼武者》於 2001 年推出,由眾所周知熱愛電玩遊戲既金城武,擔任主角「明智左馬介秀滿」,整個角色既形象都係以金城武既聲音、動作度身訂造,當時更以特別製作者身分參與遊戲企劃,創造咗劃時代創舉。

黎到今次既 HD Remaster,畫面表現上高清化角色、背景、過場,另外追加咗 16:9 畫面顯示比例(當然有得比你揀返 4:3),亦都加入「畫面捲動功能」配合玩家移動,補完因為畫面比不同既落差。聲音方面就加入新錄製日文語音、全新製作既 BGM。係操作方面,如果大家有玩過《莎木 1 & 2 HD》既話應該都猶有餘悸,不過係《鬼武者》HD Remaster 大家就唔洗擔心呢樣野,因為係原版操作系統之外,追加咗類比搖桿角色移動、行走速度,操作上係正路既,絕對可以放心。

 

遊戲含有大量謎題,非常好玩,圖中呢款需要跟返次序排一至九號

亦有陷阱式謎題,只要行錯就即死

全遊戲最難謎題,要係限時內完成,否則金城武就會浸死

要將家徽移到下方

 

《鬼武者》係使用「Fixed Cam」顯示方式,即係每個場景都會有幾個唔同角度既取鏡方向,亦都會令到畫面充滿電影感,不過現時已經好少遊戲會使用呢種方式表達,而用「Fixed Cam」呢種方式最出名既作品就係《Biohazard》。

 

係同一間房入面,會有唔同角度顯示

以前咁樣做,除咗降低效果需求之外,仲會營造好強既電影感

 

故事講述織田信長統一天下,接受咗幻魔之血,然後幻魔們順手捉埋女主角雪姬,於是金城武就出發救返條女咁。遊戲基本玩法屬於動作遊戲,隨住遊戲推進會收集到「電」、「火」、「風」三種屬性武器,每把武器攻擊力、速度、攻擊範圍同埋超必殺技「戰術殼」都唔同,玩家要因應情況而切換三把武器。

 

信長

電屬性刀

三種屬性除咗刀之外,仲會有屬性珠,對應返相同顏色及數量就可以開啟被鎖住既門

 

每次擊倒幻魔之後,都會有「魂」可供收集,玩家要企定定撳實三角制先可以吸魂,而呢三種魂分別係升級用「紅魂」、回超必用「白魂」以及回血用既「黃魂」。係遊戲內除咗數量有限既藥草及藥丸外並無回復手段,所以係打怪途中搵位吸魂呢點非常關鍵,亦都係遊戲其中一個吸引既地方。

 

一執到力石就會即用,因為可以加血上限

仲有呢種舊式機關,魂輕鬆入手

斬斷繩就可以一野車死晒下面班友

 

另一樣極為刺激既就係「一閃」系統,無記錯的話應該係本作首創。玩家只要係受到敵人攻擊既前一刻,把握時機發動攻擊就可以使出「一閃」,「一閃」掌握得好的話可以一擊必殺大部份幻魔,打地獄副本關可以話係最用技術黎。不過要練得準又真係談何容易,而且敵人攻擊力唔低,回復手段又少,並唔係咁簡單的。

 

呢隻野就係幫你傳送入副本既 NPC,而副本難度仲高過正章……

Boss 戰都設計得頗有心思

武器可以升級,除咗攻擊力之外,必殺技威力都會上升

 

《鬼武者》唯一要挑剔既地方就係遊戲時數唔算長,齋打主線的話老手大約 4 小時就可以爆機。不過遊戲整體水準上乘,放係今時今日亦都絕對唔失禮(當然你要話畫面唔夠靚既咁呢個亦都係事實),而且仲有難度唔低地獄副本關卡,絕對有挑戰性的。如果未接觸過《鬼武者》既朋友,絕對推薦你一試!

《鬼武者》HD Remaster 已經推出,對應平台 PS4 / Xbox One / Nintendo Switch / PC。

 

 

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章