【遊戲感想】世上沒有不殘忍的正義《Tales Of Vesperia 宵星傳奇 Remaster》系列傑作之一 RPG 迷必玩!

 

鍾意玩 JRPG 嘅朋友一定會知道《Tales of(傳奇)》呢系列遊戲嘅大名,當然,有經歷過佢最風光年代嘅玩家,相信都同我一樣已經唔再係十八廿二了……而家要創作一隻成功嘅本格 RPG 遊戲並唔容易,而 Bandai 旗下嘅《Tales of》亦都唔係所向無敵,隨住玩家口味改變,工作室想做出一隻超越前作經典嘅作品,恐怕更困難了吧。

《宵星》初次推出之時已經係 2008 年了(日版 XBox 360 推出時間),呢隻十年前嘅 RPG 遊戲當年初推出時已經獲得優良評價,黎到 2019 年嘅今日,畫面高清左都只係錦上添花,因為《宵》最引人入勝之處,係劇本(當然聲優陣容亦是極為吸引,男主角由利(鳥海浩輔)、弗連(宮野真守)以及艾絲堤爾(中原麻衣),都係十年前到而家都仲係人氣高企嘅一線聲優~)

如果你以前已經玩過呢個遊戲,唔知呢篇文會唔會引起你些許共鳴;如果你未玩過,而呢篇文可以引起你玩呢隻 Game 嘅興趣,咁絕對係我嘅榮幸。

 

 

遊戲嘅中心思想,係「貫徹正義」。或者你會覺得「正義」咪就係奉公守法;但係,假如呢個國家嘅「法」並唔公正呢?如果大家就算「守法」都無法喺生活中得到幸福呢?而又如果,用「正途」根本無辦法改變呢一切不公平嘅現象呢?

 

 

故事由主角身處嘅貧民區發生「魔導器被偷導致洪水失控」一事開始。由利為左追尋魔導器小偷,一路上結識到各個同伴,亦都慢慢發現,小小嘅失竊事件,原來背後關係千絲萬縷,牽涉到公會鬥爭,貴族問題,以及更久遠嘅傳說力量……

再講落去就會劇透太多,簡而言之,《宵》所交代嘅故事,深刻而精彩,情節當中有笑有淚,劇情安排絕對唔會令你感到突兀,而係好自然地投入到遊戲世界裡面。

 

 

《宵》畢竟係十年前嘅作品,所以無論係動畫質素或者系統流暢度,當然同當代嘅遊戲有少少落差 XD

戰鬥方面,遊戲用地圖遇敵法,比較有趣嘅係,玩家可以按喜好於戰場上選用所有角色(喺編整隊伍裡面設定),並唔係話「主角係由利,就只能夠用由利」咁樣。

同埋戰鬥並唔係技能回合制,而係近似即時動作模式,玩家可以隨意喺戰場上走動、轉移攻擊目標等等,亦會有致命攻擊嘅限時選項;以本格 JRPG 遊戲黎講,其實算係幾耐玩~

 

招式由自己設定(四個常用鍵)

有時可以睇準時機與隊友出合力技

 

主角由利絕對係我非常喜愛嘅主角角色,好多 RPG 遊戲都習慣將男主角設定成紅髮熱血男子,相反,由利並唔係一個時時刻刻將目標掛在口邊嘅人,佢唔會「我要救國!」或者「我要成為勇者!」咁樣,佢表面上漫不經心,但其實比任何一個人都重視國家以及同伴。

由利曾經係皇家騎士團嘅成員,與好朋友弗連原本想一齊打拚,不過後來自己對於騎士團內部權力腐化、以及國家階級問題,選擇左離開騎士團,希望與腐敗對抗;不過弗連就想爬上高位,用權力由內部改變國家。

理念與方針上嘅不同,令由利與弗連從此走在不同的世界。

 

 

不過遊戲裡面,由利同弗連正面交鋒或者起衝突嘅情況唔算多,又或者咁講,好多時弗連都不禁放由利一馬。兩個人做事方式雖然唔一樣,弗連唔認同由利「私下制裁」嘅方式,但係,同時自己亦不得不承認「腐敗的規矩根本無法快速地解決問題」。

喺由利嘅立場,雖然佢把口就話「弗連留得喺騎士團內,小心腐化埋一份」,但係心底依然好信任摯友嘅能力,好多時候佢「私下制裁」一啲壞人角色,其實亦都係間接幫助緊弗連解決佢職場上嘅阻礙。

 

 

其實遊戲中令我喜愛嘅角色仲有雷文大叔,不過講及佢嘅部份好容易會嚴重劇透,所以我忍(喂)

 

我都好鍾意佢(心)

 

至於女主角艾絲堤爾……OK 我知道佢人氣好似都高,粉紅溫柔治癒系角色,但係就算可能會得罪 Fans 我都不得不講,作為一個 RPG 女主角佢真係未免 太左膠 太大愛包容,我明佢嘅設定係「不食人間煙火嘅皇族小姐」,只不過成日都拖泥帶水、優悠寡斷、好心做壞事;我唔討厭佢,但係同時好難鍾意佢……。

 

 

當然,《宵》係一個與同伴一起成長、尋找方向嘅故事,雖然遊戲中偶爾會派便當,但係綜觀黎講都係一個好正面嘅故事。

十年前後嘅我,分別玩《宵》呢個遊戲當然亦有非常不一樣嘅感受,當年淨係覺得「好好玩,好溫暖」;而家人大左了,想法多了,不禁懷念當時能夠很單純地享受遊戲的自己,雖然遊戲依然為我帶來「溫暖」嘅熟悉感,不過思考嘅位置亦都多左。

《宵》係一個值得再三回味嘅遊戲,當然,以前嘅 RPG 遊戲,非常偏重劇情部份,所以如果追求激烈動作戰鬥嘅朋友未必會鍾意;但如果你同我一樣係 RPG Fans,我相信《Tales Of Vesperia 宵星傳奇 Remaster》呢隻遊戲,值得你買來珍藏紀念的:)

繁體中文版遊戲已經上架發售,有 PS4、Switch、XBox One 以及 PC 版本。

最後送上遊戲 Opening 主題曲,是由 Bonnie Pink 主唱的「Ring a Bell」:

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻!

追蹤

Facebook 更多文章