【試玩評測】遊戲推出前終極一試 《隻狼:暗影雙死》媒體試玩只有一人挑戰成功

我地 VJGamer 編輯部極為期待,由 From Software 製作既《隻狼:暗影雙死》好快就推出,雖然之前係旺角 PlayStation 聖誕小鎮有提供過試玩,不過我諗大家都唔係幾夠喉。好在早前 PlayStation HK 特別舉行咗一次媒體試玩會,提供咗極接近完成品既《隻狼:暗影雙死》比我地盡情試玩,今次我地仲成為全場唯一成功擊敗新強敵「赤鬼」既媒體,當然要同大家分享下遊玩過程!

 

 

「破戒僧」試玩版及玩法介紹

 

今次試玩既《隻狼:暗影雙死》同完成品已經非常接近,遊戲開始既部份同之前試玩版唔同,係由故事最開頭既部份開始,亦即係由主角保護皇子失敗、得到忍義手後正式後開始。

遊戲開始既地方係「葦名城」,係呢部份玩家要去拎忍義手既火屬性武器,然後再挑戰強敵「赤鬼」。同之前既估算唔同,本關既 Boss 並非之前試玩版既「破戒僧」,不過「赤鬼」攻略難度亦都頗高,絕對唔能夠睇小佢。

 

 

未見「赤鬼」前,多數時間都係見到小兵,同《Dark Souls》相比,小兵感覺上比較弱。雖然單對單小兵狂撳 R1 都劈得死(用反技直接一下死),但係當面對三隻以上小兵仍然有危險性,而用火槍打遠距離既小兵攻擊頻率頗高,唔理的話隨時會比小兵圍死,盡量唔好一對多呢點同過往作品一樣。

 

 

 

除咗小兵之外,仲會有「武將」呢類比較高階既兵種。武將招式多元化,攻擊力高,部份招式仲有霸體,而且仲有2行血,必須要集中精神應付。而殺死呢種特殊敵人會得到一個道具,只要集齊四個就可以提升血量上限,不過呢類特殊敵人有固定數量,即使坐火都唔會重生的。

 

 

 

去到挑戰強敵「赤鬼」,佢主要攻擊手段有「衝前投擲」、「雙飛腿」、「踢腿」(有2連擊同3連擊)、「飛撲投擲」幾種。係呢度需要同大家簡短講下《隻狼:暗影雙死》既防禦手段,因為有玩過《Dark Souls》系列、《BloodBorne》既都知道打強敵必須了解敵方招式,以及破解手段。

《隻狼:暗影雙死》防禦手段分為三種,普通格擋、閃避以及跳躍。普通格擋雖然可以擋到大部份攻擊,不過對於投擲技係無效,而且無睇準時間格擋的話,自己好快就會被敵人破防(詳見之前文章介紹)。

而閃避雖然可以避開攻擊,但係本作強敵橫向攻擊範圍極大,一旦閃避失敗就會承受極大傷害,建議同格擋交互使用。

最後既跳躍屬於首次出現既防禦手段,係《隻狼:暗影雙死》入面,敵人會有專攻下段既招式,呢個時候就需要用跳躍黎閃避。

 

使用「忍義手」武器亦都非常重要,好似「赤鬼」呢類怕火既敵人,只要用火攻就會做成一段短時間硬直

 

攻略「赤鬼」時,第一行血只要保持小心,唔算太難應付。問題在於第二行血,「赤鬼」會積極使用「飛撲投擲」,呢招實戰測試格擋以及閃避都無法破解(招投技追尾性能超高),唯一破解手段就係使用跳躍,當知道所有招式應對方法後,「赤鬼」唔算難對付。同時呢戰亦令玩家深深體會到本作面對強敵需要快速切換戰鬥策略,比起同廠其他作品更為緊張刺激!

 

打完「赤鬼」後,就有得挑戰騎馬武將,可惜當日時間唔夠無得攻略

 

完成「赤鬼」戰後,尾段仲有「金剛寺」地圖遊玩,除咗測試多種「忍義手」道具外,仲發現呢個地圖敵人非一般咁強,感覺上每隻小兵都有《Dark Souls》入面「銀騎士」強度。而且更首次出現超大量會攻擊玩家既「小強」,殺極都有,非常煩。(下面片段啲武僧屬於「金剛寺」地圖食物鏈最低層敵人)

 

 

總括黎講,《隻狼:暗影雙死》經編輯部同事多次試玩下,認為今作比起 From Software 其他作品難度更高,亦並非坊間所傳既「咪即係仁王」,絕對係二款遊戲,而且《隻狼:暗影雙死》難度、動作豐富性、戰術比起前者更高,鍾意虐待自己既《隻狼:暗影雙死》絕對係你既首選!

 

 

《隻狼:暗影雙死》將於 3 月 22 日正式推出,對應平台 PS4 / Xbox One / PC。

 

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章