【無雷感想】《Marvel隊長》十年最強角色的確有點失色

Marvel Studios 搞左成個《Marvel電影宇宙 (Marvel Cinematic Universe (MCU))》大大話話都 10 年,淨係講上映都講緊有 20 套戲。質素各有高底就一定啦,你睇《雷神 (Thor)》頭兩集幾出事就知,但係嚟到啱啱上映嘅第 21 套,亦係成個 MCU 第三階段嘅尾二一套電影《Marvel隊長 (Captain Marvel)》

大家都記得《復仇者聯盟:無限之戰 (Avengers: Infinity War)》可以玩到全宇宙死一半人,而喺《IW》片尾見到 Nick Fury 拎個 Call 機出嚟就係叫呢個可以話係最強角色 Captain Marvel 出場救世界。以 MCU 一向做法,《Captain Marvel》呢套獨立作品當然係為左介紹佢嘅能力同背景資料。

《Captain Marvel》故事發生喺 1995 年左右,大家熟 MCU 故事時間線嘅,但係我諗成個《Captain Marvel》製作團隊冇乜睇過 MCU 電影,事關神盾局(S.H.I.E.L.D.)當時係未叫神盾局,仲記得《鐵甲奇俠( Iron Man)》電影近尾聲嘅時候 Agent Coulson 先話叫「SHIELD」,《IM》開頭都叫緊 Strategic Homeland Intervention, Enforcement and Logistics Division 仲話之後先用短稱,用「SHIELD」呢個名冇可能會喺 95 年嘅《Captain Marvel》出現掛?!

唔係呃你,Netflix仲有《Iron Man》喺度,自己飛去 44 分鐘睇

老實講句大家睇每個新角色嘅首套作品都預左佢老土公式化,你比到啲特別嘅人物性格,好標致性嘅能力又或者角色之間有趣嘅對白同互動都已經可以好收貨,但係《Captain Marvel》喺以上嘅要求都未叫得上合格。而且宣傳期力推嘅 Goose the Cat 係幾可愛嘅,但出嚟冇頭冇尾冇緣因,仲要大家覺得喺個空軍機地資料庫見到佢就奴才上身係咁同佢玩,大佬啊你唔好當我地真係唔帶腦出街先得架?!

可愛還可愛,合理還合理,兩係事嚟架!

以上我都當唔緊要,大家睇預告都知當時 Nick Fury 隻左眼都仲未盲,咁的確喺《Captain Marvel》呢套電影入面係有交代到致盲原因,不過都唔好講 Fans 接唔接受戲中呢個緣故,我同場坐隔離五十路女士都爆左句「咁兒戲?」我真係寧願你唔拍都好過比個咁嘅解釋出嚟。

總結黎講,同以往 Marvel 電影作品比較,今次《Captain Marvel》導演無花太多心思將漫畫合理化地演變成真人電影,導致好多 Signature 內容變得草草了事,甚至乎唔交代,以一套介紹初登場英雄嘅電影作品黎講的確有點失色。

而如果大家覺得係特技動作大片嘅話就真係連嗰幾十蚊都唔洗加去睇大銀幕震震椅之類,事關打又唔算多,又唔係緊張刺激,動作場面加埋有冇十分鐘都成問題……不過你唔睇嘅話呢排又冇乜話題,所以睇係要睇,但真係唔洗投資太多,不過買得飛記得記得記得準時入場!

最後片尾有兩條,第一條同《復仇者聯盟:無限之戰 (Avengers: Infinity War)》有關所以唔睇就走寶;而第二條就可睇可唔睇,如果趕時間走左都冇損失嘅。

阿九

阿九 打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enought! Lego Enthusiast https://goo.gl/HRnxDW

追蹤

更多文章