【遊戲試玩】開放世界喪屍遊戲《Days Gone》 集潛入、刷裝、解謎於一身之作

之前我地就介紹過台北電玩展入面展出既《Days Gone》,不過上次版本就淨係得生存戰玩,無法感受係喪屍橫行既開放世界活動有咩感覺。慶幸早前 PlayStation HK 舉行咗一次媒體試玩會,除咗有新版本既《Days Gone》比我地盡情試玩外,仲請到製作呢隻遊戲工作室 Bend Studio 既社群經理 David Lee 黎到香港,為大家解答有關遊戲既問題。

 

 

先講一講試玩部份,遊戲一開始有一小段情節講述喪屍潮爆發前,主角身邊發生咩事,呢度我地就唔劇透啦。遊戲正式開始已經係喪屍潮爆發既二年後,玩家就要係呢個資源短缺加上周圍都係喪屍既世界中探索、生存。

 

 

如果有留意《Days Gone》之前放出黎既影片,相信都留意到本作不可或缺既一樣野,就係載具「電單車」。整個遊戲中,電單車擔任極重要既一環,重要性同《Red Dead Redemption 2》隻馬差唔多,而主角部電單車仲可以透過購買零件去強化。另外遊戲中唔係淨得主角一部電單車可以控制,遊戲中容許玩家搶奪其他 NPC 既載具。另外遊戲中會有唔同既「營地」,透過提升該營地好感度將會得到支援,例如增加可購買 Item。

 

旅程中有好大部份時間需要到載具

使用電單車會耗油,而車本身亦有耐久度,可以收集零件去修復

 

當遊戲正式開始無耐,第一個任務就係追捕懷疑係跑錯棚既 NPC「Leon」,係追捕過程中系統會教玩家使用「探索」技能,類似《刺客信條》入面既「鷹眼」。使用後畫面會變成黃色,呢個時候就會感知相關線索既方向,當方向正確的話,手制就會震動,然後逐步接近目的地。

 

地圖非常之大

 

整個遊玩過程詳細唔講太多,留返比大家發掘。不過當中有幾樣元素算係幾特別,需要講下。遊戲中會有好多被喪屍佔據既地點,而呢啲地會有一啲「巢穴」,玩家發呢啲「巢穴」之後,可以掉燃燒彈入去,咁入面既喪屍就會被逼出黎。當玩家完全清晒該地點既巢穴之後,就可以控制該區,之後可以用快速旅行返黎呢個地點,唔洗揸車揸餐死。

另一點同其他常見喪屍遊戲唔同,本作既喪屍係會食返自己同類的,而且根據 David 所講,玩家仲可以引啲喪屍去攻擊其他敵對人類,係一邊睇坐收漁人之利。同時玩家亦都可以慢慢接近暗殺喪屍,靜靜地咁清理整個地區都係可以的。

 

遊戲中除咗喪屍之外,仲會有敵對人類存在

 

作為生存遊戲,資訊貧乏就預咗,好在大家係周邊地區探索係會有子彈、槍、藥品呢類野執,而殺喪屍亦會跌素材的。David 就呢點亦都同大家補充,只要經過一段時間,大家係原地點執過既道具係會刷新的,唔會話出現無子彈打喪屍既情況。

 

 

當然大家最關心《Days Gone》,就係果種狂暴喪屍潮。David 有講到係遊戲中會出現大大小小既狂暴喪屍潮,面對排山倒海既喪屍,係幾過癮既!最後 David 仲提到遊戲主線連同支線任務內容要玩晒需要過百小時,都幾抵玩,雖然遊戲入面各種元素係其他遊戲都有出現過類似既野,但係綜合晒係同一隻喪屍遊戲入面,都的確係可以一戰的。

 

狂暴潮非常刺激

 

《Days Gone》將於 4 月 26 日發售,由 PlayStation 4 平台獨佔。

 

回帶相關文章:

【台北電玩展 2019】出乎意料地難玩 《Days Gone》現場試玩挑戰玩家生存率激低

 

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章