Switch 可以話係好多 Indie 遊戲嘅集合平台，唔少先行喺 Steam 發行嘅遊戲，如果反應好，下一步都會登錄埋 Switch。

今次介紹呢隻《The Shrouded Isle》亦都唔例外，遊戲由加拿大獨立工作室 Kitfox Games 開發，於 2017 年 8 月時於 Steam 上面首發；由於遊戲理念都幾病態，所以得到唔少網友以及玩家關注。

遊戲發生於一個與世隔絕嘅孤島上面，島上面有一個勢力極大嘅極端末日主義教會（唔好問我即係咩），而玩家嘅身份，就係呢個教會嘅主司祭。你同教會深信邪神將會於 3 年後復活，所以為左得救，就必須及時將唔信服教會嘅「異教徒」加以排除。

咁島上面有五大貴族，分別代表「無知」「情熱」「自制」「後悔」以及「服從」五樣特質，玩家要喺當中挑選一位黎作為你同市民嘅溝通中間人；不過每位貴族都有「善德」以及「惡德」方面傾向，會影響市民對教會嘅認同性；而呢個傾向嘅比例係隨機設定的，玩家一開始係唔會知道到底自己揀左嘅人係咪真係幫到自己。

如果去到最後，你成功利用貴族管理人民，就會喺每個季節完結時決定揀選邊個人黎做宗教祭品；又或者，假如你管理不善，比貴族及市民反咬一口，推翻教會，咁就為之 Game Over。

遊戲一共有 6 個結局，作為一個異色另類經營系遊戲小品黎講，係一個幾有趣嘅選擇！Steam 版對應英文、日文及簡體中文，而 Switch 版似乎就未有中文版對應，定價 1,480 日元。

【Steam 版傳送門】
【Switch 版傳送門】