【新角色人設獨特】臭作驚現《莎木 III》(誤)遊戲可以交流嘅 NPC 數達到 500 人!

 

著名遊戲系列《莎木 III》即將於 2019 年 8 月 27 日發售,對應平台為 PS4 及 Windows。《莎木》系列第一集始發於 1999 年,當時發行平台為世嘉 Dreamcast,不過由於開發《莎木 II》時耗費驚人,收支未能取得平衡關係,搞到《莎木 III》要拖到 2015 年先由製作人鈴木裕先生於 Kickstarter 上面集資,改由 Ys Net 開發,並由 Deep Silver 發行。

《莎木 III》頭幾次公開嘅片段同截圖都有種微妙嘅復古味,喺舊年嘅「MAGIC Monaco 2018」上面公開嘅片段已經叫進步好多(詳文按此);事隔一年之後,再次發放新片段嘅《莎木 III》到底又搞成咩模樣呢?

 

 

啊咦……

由於故事背景係 1987 年左右嘅亞洲,加上芭木涼於遊戲當中係去左中國山區唔知邊一度的,所以整體感覺比較農村質樸;不過涼君嘅模組依然……有少少生硬,個鼻樑窄得黎仲要反哂光咁樣,好似都係唔夠自然。

然後,有一個唔知戲份有幾重嘅角色,我地編輯部一見到,就有成員話「呢個角色根本係《臭作》黎……」

 

 

唔明《臭作》係咩嘅朋友,唔緊要,唔好特別 Search,你當係某部份年紀男士嘅 Inside Joke 啦(不過我地個女編輯聽得明,佢好恐怖……)

黎到 2019 年嘅遊戲世界,當編輯部最近攻略緊嘅遊戲係《DMC 5》嘅時候,呢個時候見到《莎木 III》呢個畫面,的確,會有少少年代感落差的。

不過以貌取人是不對的,YS Net 似乎都擺左好多心機去製作《莎木 III》;當年有玩過舊作嘅朋友,應該都會好認同《莎木》喺系統上嘅細緻度係非常用心的(例如唔同天氣會影響唔同 NPC 作息等)。黎到《莎木 III》,製作人於《MAGIC 2019》表示,可以進行交流互動嘅 NPC 有接近 500 位,相信會有好多因此而衍生嘅支線。

 

 

片段中亦見到芭木涼為左尋找藍帝而不斷搵 NPC 查問、以及為左變強而搵師傅拜師等畫面,動作操控好唔好就要等 Demo 版(如有)推出後先至再同大家分享。

外國唔少玩家睇完以下《莎木 III》片段就話「極為期待」,唔知你地又點睇?

 

 

麻生龍

中二病廢中,打機會自己講野自己笑,鍾意睇機械人動畫,貓世一。

追蹤

更多文章