【遊戲雜談】《Tales Of Vesperia 宵星傳奇》勾起好多美好嘅 RPG 歲月《Tales》你又玩過邊幾集?

 

今年較早時份 Bandai 推出左《Tales Of Vesperia 宵星傳奇》嘅 HD Remaster 版本,作為一個《傳奇》系列嘅 Fans 我亦都就呢個新版本寫左感想文(感想文按這裡)。

作為《傳奇》系列其中一隻經典好評作品,玩返《宵星》之後,唔少網友同好都紛紛表示「真係勾起好多回憶」。無錯,呢一點我都好認同,所以我都想寫篇文同大家一齊懷念一下。

《傳奇》系列始於 1995 年於超任推出嘅《Tales of Phantasia 幻想傳奇》,不過當時年紀尚小,所以無機會玩到。我第一部擁有嘅遊戲機係 PS2(當時中學雞,儲左好耐零用錢先買到!),而我首次接觸嘅《傳奇》就係《Tales of Destiny 命運傳奇》於 PS2 上面嘅高清版本。

 

 

唔玩猶自可,一玩,廢寑忘餐。

當時我有接觸到嘅 RPG,除左 PC 上面台灣大宇嘅《仙劍》《軒轅劍》系列仲有一堆金庸系列遊戲之外,PS 平台上面嘅,就只有《Final Fantasy》;而家大個左,當然知道仲有好多精彩遊戲啦,不過,嗰時一來未咁頻密地使用互聯網,二來作為一個女校學生,身邊幾乎係無同齡朋友可以交流到任何遊戲資訊,所以我涉獵嘅遊戲並唔多。

 

 

但係,同《FF》唔同嘅係,《TOD》嘅世界觀以及人物關係,比較直接,比較貼地;雖然我都好鍾意《FF》宏大而超現實嘅設定(我由 8 開始玩起,再玩返舊作咁樣),但係玩《傳奇》系列,會帶比我溫暖同勇氣。

Sorry,我知咁講好似好中二……。

 

《TOD》裡面嘅リオン(里歐)簡直係少女時期嘅我其中一個極為喜愛嘅角色(仲有一個原因:佢聲優係綠川光 w)

 

當年嘅《傳奇》仲有一樣令人難以忘懷嘅特點,就係出色嘅主題曲,我因為佢嘅主題曲不斷認識到更多日本歌手,例如 DEEN、倉木麻衣(佢地幫《名偵探柯南》都唱左好多出色歌曲),以及而家已經解散左嘅 Day After Tomorrow 等等。

講開《TOD》就拎返 DEEN 為佢主唱嘅主題曲黎做例子吧!《TOD》主題曲「夢であるように」,前奏一起,配合埋遊戲 OP 嘅映像……我到而家仲好記得當時一開 Game 個心強烈嘅觸動。

 

 

至於 2016 年時登錄左 Steam 嘅《Tales of Symphonia 交響樂傳奇》,初次推出為 2003 年,當時平台為任記 GameCube,我玩完《TOD 1&2》之後第三隻接觸嘅《傳奇》。不過唔知係《TOD》帶比我嘅衝擊太強大,定還是《TOS》真係無咁出色,我對呢隻遊戲又無話特別大愛。

於 PS2 平台上推出嘅《傳奇》我幾乎玩哂,不過《TOA》之後因為要準備首次公開考試,我斷斷續續有好幾年放低左遊戲機。然後,讀書,升學,再讀書,再大學……我最後認同嘅《傳奇》系列,或者就要數《Tales of Xillia 1&2》了。

嗰幾代嘅《傳奇》主題曲幾乎係 avex 音樂公司獨佔,《Tales of Xillia 1&2》兩代主題曲其實都係浜崎あゆみ主唱的,下為《TOX2》主題曲「Song 4 u」。

 

 

有關《Tales of Xillia 無限傳奇》我想之後有機會再寫文,在此先不詳述,不過我諗好多在座玩家同我一樣,經歷完《TOX》,一等再等,等到《Tales of Zestiria 熱情傳奇》推出之後……

大家都感到有點受背叛了吧。

 

 

《TOZ》炎上事件,相信就算唔係 Fans 都會略有聽聞;簡單黎講,就係製作人馬場英雄非常不負責任地,將「由前期宣傳去到遊戲推出後都一直奉為女主角」嘅 Alisha,無啦啦,喺遊戲中盤就將佢永久離隊,然後搵另外一個女角色Rose 取代佢嘅「女主角」位置。

當時有唔知道發生咩事嘅玩家話,角色中途離隊,無乜野呀,《FF7》Aerith 都死左無得用呀,有咩問題?

問題咪就係:Aerith 死,但佢係戰死呀,有價值架,配合故事架!同埋佢嘅死係成功架,佢令幾多玩家對當時一幕留低深刻印象先?而家《TOZ》Alisha 係出左場、大家努力培育佢一輪之後、因為製作人話「喔佢要去感受世界」就離隊,然後你地仲想見到 Alisha 嘅,唔緊要!買 DLC 啦!買 DLC 就可以知道女主角去左邊啦~

 

 

呢個係一個幾咁不負責任同埋難睇嘅營商手法,我都唔想再多講,只係事隔多時,而家諗返起呢件事,我都仲係不禁嘆一口氣。

《傳奇》二十年招牌,到最後變成咁樣,就算馬場英雄馬上辭職(佢之後去左 Square Enix 一個新 Studio,但係個 Studio 到而家都好似未請夠人開 Game),都令到好多《傳奇》Fans 選擇活在美好回憶裡面,唔想再面對已經破損嘅系列了。

不過,角色無罪的,遊戲都係無罪的,去到最新一集《Tales of Berseria 緋夜傳奇》工作室換左製作人,我都係死死地氣玩埋落去。遊戲中明顯感受到工作室好努力想挽回 Fans 嘅心,所以劇情同埋主角性格,我都覺得略嫌用力了些,整體,算是不過不失吧……。

 

 

而呢隻《緋》已經係 2016 年嘅作品了,Bandai 今次推出《宵星》Remaster 喺全球都賣得非常好,而《傳奇》過去的確有唔少佳作,唔知道《宵星》嘅好反應,會唔會令 Bandai 繼續推出例如《TOD》嘅重製或高清版呢?又或者係準備緊全新嘅正傳《傳奇》作品?

利申如果出返《TOD 1&2》我一定會再玩多次!)

P.S. 篇幅有限,所以呢篇文章都係極表面地分享左我一啲個人想法,多謝你睇到呢度。如果有同好或者玩家睇完想分享你地其他感想或者睇法,好歡迎你投稿同其他網友進行交流的!

 

相關文章:
【遊戲感想】世上沒有不殘忍的正義《Tales Of Vesperia 宵星傳奇 Remaster》系列傑作之一 RPG 迷必玩!

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章