細細個聖誕節屋企人開電視睇「明珠930」，總會見到翻播又翻播《寶貝智多星 (Home Alone)》同《寶貝智多星2之玩轉紐約 (Home Alone 2: Lost in New York)》，睇完真係試過將屋企裝晒陷阱等賊入屋，結果當然係變左 Kick 低老竇老母，自己比人打到飛起。
呢套 90 年代嘅經典，就連上年 Google Assistant 聖誕廣告都要玩多次，你就知道外國有幾多人仲記得 Kevin 呢個癡線細路啦！玩具都一樣，其實 2015 年 NECA 食住《寶貝智多星》 25 週年都有出過套 Figure，不過間大屋就真係冇乜玩具廠商出過。正因為咁外國創作者 adwind 就整左個成間大屋 (McCallister’s House) 放上 LEGO Ideas 度希望大家支持令到呢個咁經典嘅電影場景實現。
首先一讚嘅當然係娃娃屋結構，方便玩家隨時打開見到屋內情況，其次就梗係將大部份嘅陷阱場景用 LEGO 組件還原！
除左陷阱之外，場景其他佈置亦令大家記返起戲中嘅情節啦！
接近 3000 件嘅 Home Alone. McCallister’s House.，當中包括埋主角 Kevin 同兩個”濕笠笠大盜” Harry 同 Marv！雖然一個月已經有三千幾票支持，但距離一萬票都仲有一段距離。你都希望呢個咁有趣嘅大屋可以量產，咁就快手去下面嘅傳送門投票技持啦！
《寶貝智多星》McCallister’s House LEGO Ideas 傳送門
阿九
打機 - 識少少；玩具 - 識少少；睇戲 - 識少少；動漫 - 識少少.....
買膠、派膠、分享膠！Only The Best Is Good Enough！
Lego Enthusiast //goo.gl/HRnxDW