自由探索潛艇遊戲 《UBOAT》做指揮官掌握全船命運

細細個就對海戰情有獨鍾,不過主打海戰既遊戲就並唔係咁多,主打 PVP 既有《Navy Field》、《World of Warship》,而主打過關兼主力玩潛艇印象最深既就係《海底大戰爭》。以上幾款海戰遊戲主要既部份都係戰鬥,但係如果要你做埋指揮每位船員兼要你顧埋佢心理狀況,仲要你預埋出海需要準備幾多糧食等等瑣碎野,你估自己又玩唔玩得掂?黎緊呢隻叫做《UBOAT》既潛艇遊戲就要兼顧晒上面所有野!

 

 

《UBOAT》由 Deep Water 工作室製作,屬於一款潛艇模擬沙盒遊戲,之前曾經出過一個比 Kickstarter 眾籌支持者玩既 Beta 版,係外國評價不俗。

《UBOAT》遊戲背景係最備受玩家喜愛既二戰,大家會係遊戲入面扮演一位德國潛艇指揮官(唔好問點解係德國,個名都寫咗係 UBOAT 啦),除咗要控制船員控制船隻之外,你仲要照顧埋佢地既身心健康,如果班水手們又餓又攰的話,就會導致戰鬥力低下,本身打得贏都會變打輸。

 

 

身體狀況顧之然要理,心理狀況都不能夠忽視。根據官方資料,每位船員都有紀律同精神創傷二個數值,需要時刻留意。如果精神創傷值高的話,會顯示出該船員既秘密特徵,例如有酗酒習慣,呢個習慣會令佢變得狂暴,甚至有機會因此變成懦夫或者間諜。

 

 

《UBOAT》設定極為細緻,基本上每個崗位都有得玩,例如聲納室、掌舵、用潛望鏡偷睇等等。遊戲入面會提供關鍵任務,可以參與戰二戰歷史戰役;系統亦會自動生成各種隨機支線任務,玩家可以根據總部既指令去調查失蹤船隻、亦都可以攻擊敵國貨船等等,當然部份貨船會有護航艦隊,要擊沉敵船亦都唔係咁簡單。完成任務之後可以係碼頭安裝更好既設備,不過你升級既同時敵人都會升級,唔會話比你開一隻船出去無雙。

 

船上會發生各種情況,後面就水浸緊,作為指揮官既你會點做?

 

當然玩家亦都可以唔做任,係沙盒模式內自由咁探索廣闊既大西洋,想點玩非常隨意,當佢係一隻潛艇模擬器都無問題!《UBOAT》係 Steam 上面已經開咗相關頁面,預計將會係 2019 年春季推出「搶先體驗版」,有興趣玩家留意啦。

 

 

《UBOAT》Steam 傳送門

五木

五木 動漫電玩宅,極愛金田一系列,擅長動作及策略遊戲

追蹤

更多文章