【毒品風波】羽村頭子(瀧正則)疑似吸毒《Judge Eyes:死神的遺言》日本全線下架自肅處理

 

曾出演大熱遊戲《JUDGE EYES:死神的遺言》以及聲演日版《冰雪奇緣》及《Kingdom Hearts III》「雪寶」一角嘅日本藝人瀧正則(ピエール瀧)早前因為疑似吸食可卡因被捕,呢件事除左為佢幾十年嘅演藝生涯蒙上陰影之外,日本當地唔止將佢所有綜藝活動中止,世嘉仲剛剛發聲明,會將《JUDGE EYES:死神的遺言》數位版、實體版以及所有宣傳海報全線下架作自肅處理。

 


唔單止貨物下架,世嘉仲決定將所有有關遊戲嘅 Twitter 發文全部刪除,直至今次吸毒事件告一段落咁話。日本有好強嘅自肅文化,以今次世嘉為例,因為瀧正則疑似觸犯「麻薬取締法」,為左品牌形象以及「唔想為大眾帶來唔愉快嘅體驗」等理由,會將遊戲下架,亦都係意料之內。

 

日本方面大肆報導是次吸毒事件

瀧正則有關節目活動海報一律快速移除

 

世嘉亦唔係第一次遇上呢啲事件,例如早前推出 HD 版嘅《人中之龍 4》裡面飾演「谷村正義」一角嘅成宮寬貴,亦都因為涉毒被捕,世嘉亦都改變角色模組以及聲優應對;唔知《JUDGE EYES》黎緊會唔會同《人龍 4》一樣進行模樣改組?

《JUDGE EYES》作為世嘉重頭遊戲作品,今次遇上呢件事相信亦會影響遊戲銷售量,希望事件快啲告一段落!

 

麻生龍

麻生龍 客席編輯,中二病廢中,打機會自己講野自己笑,鍾意睇機械人動畫。單身寡佬,目前日本在住(流放)中。

追蹤

更多文章