【遊戲介紹】Steam 上好評日式傳統恐怖遊戲《影廊 Shadow Corridor》幾乎一人包辦所有製作

 

恐怖遊戲一直喺市場上有唔少 Fans,而喺 Steam 平台上面,一隻名為《Kageroh: Shadow Corridor》嘅遊戲就剛剛於 3 月 8 日上架。

呢隻定價只係 HKD45 嘅 Indie 遊戲,推出之後喺 Steam 上面大獲好評,連製作人都忍唔住驚訝話「無諗過隻遊戲咁賣得!」咁到底呢隻遊戲有咩特別之處呢?

 

 

遊戲前身名為《影廊-ShadowCorridor-》,係製作人城間一樹先生於 2017 年推出比大眾下載嘅免費遊戲;喺收到玩家意見之後加以改良同埋強化,然後就將遊戲正式擺上 Steam 平台上面試水溫。

 

 

《影廊》係一隻以 Unreal Engine 4 開發嘅第一視點 3D 和風恐怖遊戲,時代似乎為過去嘅日本,玩家需要逃離迷宮同時,亦要躲避一班戴住「能面」嘅怪物;而迷宮嘅路線係隨機生成的,每次重新開 Game 都會唔同,所以根本唔會存在「攻略」或者「記住條路下次可以玩快啲」呢啲選項,玩家每次開 Game,都要重新用腦!

由於唔能夠對敵人進行攻擊,加上難以捉摸嘅地形構造,《影廊》帶比玩家強烈嘅「無力感」以及「不安」正正係遊戲最大賣點。

 

 

成個遊戲除左背景音樂、美術素材同埋語言翻譯係外判搵人幫手之外,無論係系統抑或理念都係城間先生一個人一手包辦。話說城間先生其實並無完成佢嘅大學學位,佢選擇離開學校以自學方式去製作遊戲,所以《影廊》其實係佢第一隻完成開發嘅心血。

推出之後,遊戲喺日韓地區嘅直播平台上成為熱門直播遊戲,令到《影廊》人氣急升,城間先生都坦言係「意料之外」咁話。

 

 

如果你對恐怖遊戲有興趣,不妨都考慮下入手呢一隻《影廊》,對應平台為 Steam,語言為日英韓文(不過無咩字耍睇,無中文都唔緊要嘅)!

 

 

Steam 傳送門

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章