大受好評鬼佬版芒亨《Dauntless》 今個月中就有得玩!

有鬼佬版之稱既《Dauntless》,香港可能唔太多人識,不過外國自推出後一直都幾受歡迎下。遊戲由上年開始於 PC 上進行公測,到今年終於正式宣布會於 PS4 / Xbox One / PC / Switch 及手機平台上推出,預計 5 月 21 日就有得玩!

 

 

《Dauntless》背景講述玩家處於一個因為一場大災難,而突然出現大量巨型漂浮島幻想世界,係呢啲島上滿佈各種兇猛既史前巨獸,需要對抗獵殺佢地先可以生存。同《Monster Hunter》系列一樣,玩家獵殺呢啲巨獸後,可以用佢地身上既素材黎製作更強大既武器及防具,當然亦都有多種武器類型及技能選擇。

 

 

而遊玩部份,遊戲將採用第三身視角,最大支援四人連線協力。係村莊入面同樣有任務版、武器店、防具店、道具店等設施,做慣獵人既應該好快上手。畫風同《Monster Hunter World》寫實風格迴異,比較接近《Fortnite》卡通風格。

 

 

《Dauntless》PS4 / Xbox One / PC(Epic Game Store)將於 5 月 21 日正式上市,免費遊玩,至於 Switch 同手機平台上市日期就要等到年尾先公佈。《MHW》大改版就要等到 9 月先有得玩,今個月又靜靜地,不如約埋版 FD 試下呢隻鬼佬版芒亨啦!

 

滅盡殺手

重度魔物獵人中毒者,歷代遊玩時間破億分鐘!

追蹤

更多文章