【創作人專訪】用LEGO創作 保育昔日《唐樓》回憶

唐樓喺大家第一印象係舊?冇𨋢?會冧嘅危樓?

定係充滿住城市回憶?要保育?有歷史嘅建築?

Dick Cheung 嚟講一定係後者,如果唔係佢一定唔會用 LEGO 去創作《唐樓》呢個作品,仲要已經係去到第四度嘅版本。貫徹前三件《唐樓》作品風格,再加上近年喺創作唔同作嘅時候得到嘅精粹。《唐樓 4》唔單只係佢第四次製作嘅唐樓作品,亦係將現實新舊元素共冶一爐所創作出嘅新作品。

《唐樓 4 (Tong Lau Ver. 4) 》 by Dick Cheung

每一面,每一個角度都有佢獨立嘅時空同風景

街頭文化變成近年年青人嘅打卡熱點

Docter Strange嚟過香港你唔知咩?(笑)

時空慢慢倒流,24小時便利店嘅出現,有冇影響小店嘅生計?

依家嘅報紙檔真係買少見少

 

時間再回溯,仲記得細細個樓下買零食嘅士多嘛?

得一蚊,扭個彈彈波定係坐車仔好?

天台呢個生日會場景,係咪同佢自己生日有關呢?

問到阿 Dick 點解會砌《唐樓》呢個系列作品原來要數到 7、8 年前佢以舊香港特色景物去創作,砌左好似富豪雪糕車、炒栗子車等等嘅作品。到第一次參加作品聚會展覽展出《大牌檔》,得到好多迴響之後就決定成個系列以一整條「街」嘅方向發展。

一切嘅契機就係由呢個《大牌檔》(2011) 開始

用舊香港做創作主題,本來係純粹想比自己回憶細個小學時代所喜愛嘅建築、檔攤,但獨樂樂不如眾樂樂,作品曾經拎過去一啲學校展覽,唔單只令到睇嘅父母回味從前,亦可以比小朋友喺父母口中得知昔日嘅社會樣貌,所以就以呢個作為動力去繼續落去。

除左喺舊作搵返個花牌再重新製作,呼應返之前嘅作品,同時為左提升像真度同共鳴感,加左好多特色招牌喺今次嘅創作。而有一個招牌阿 Dick 自己都覺得非常滿意「我自己比較喜歡7仔招牌,因為砌法係之前未試過,要做到唔太厚又做到字型算係個新挑戰」見過呢個7仔招牌嘅網友都大讚用件同砌法出神入化。

有特色嘅又點只招牌,阿 Dick 最拿手嘅士多亦有好多細節值得留意

最後梗係要八掛下嚟緊會有咩新作預告或者新計劃構思當中「將來或者可以試砌好「雷生春」、「鐘樓」之類現實建築物,而《唐樓》就要到我搜集到足夠資料或者有新 Ideas 先會再出現」。

唔係為比賽、唔係為出名,純粹創作到搵到使命感去推廣保育,呢份負出同堅持係好值得大家欣賞同加許,如果你仲想留意多啲阿 Dick 嘅作品,就可以去佢嘅作品 Page 比個 Like,同佢分享下你嘅睇法同意見。

Dick Cheung 作品 Facebook Page (Dick’s Laboratory) 傳送門

阿九

阿九 打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enought! Lego Enthusiast https://goo.gl/HRnxDW

追蹤

更多文章