SEGA Games（乜力）早前公布呢隻《超音鼠賽車》（Team Sonic Racing）果陣，全世界都係抱住「咪又係抄孖車」既心態去睇呢隻 Game（包括我），但係當試玩過後感覺上又並非如此，有比孖車優勝既地方亦有輸蝕之處，感覺上都算唔錯。

《超音鼠賽車》（Team Sonic Racing）顧名思義，玩家將可以選擇一眾由《超音鼠》系列角色所操控既賽車，於賽道上爭取勝利（其實如果架車唔夠快，落車跑會唔會好啲？）。遊戲明顯大量參考友廠名作《Mario Kart》，例如基本既食「？」拎道具、可以用道具攻擊對手、賽道上有捷徑、有車種類型等等元素一應俱全。但係 SEGA 係以呢啲元素做基本，針對多人遊玩作出改進，令到遊戲既團隊合作性、戰略性更豐富更好玩。

右上角係道具欄

遊戲主打多人對戰，連線多人遊玩最大支援 12 名玩家對戰，亦可單機分割畫面 4 人同遊。係多人模式下，玩家可以選擇孤軍作戰，或者同朋友組成小隊進行隊制賽，而隊制賽正正就係本作好玩既地方所在。同孖車一樣，玩家食「？」將會拎道具，係《超音鼠賽車》入面，玩家可以選擇自己用又或者將道具過比隊友，當接受隊友道具後，該道具除咗會強化外，仲會提升超必殺技能量槽，亦即係話不停「供養」名次較前既隊友，佢就會比正常更快地儲滿超必殺技（放超必後會加速同無敵），掌握更多優勢。

下面條 Bar 滿咗就可以出超必

隊友「供養」道具，需要確認接唔接受

另一個系統「Touch Dash」亦都幾有趣，如果隊友炒車，只要你係佢身邊擦過，隊友就會獲得即時加速 Buff，而且當二隻速度差距越大，呢個 Buff 加成就會越多，隨時反敗為勝！

當然亦有類似孖車「真空隧道」系統，不過就更為簡單易用。隊中處於最高名次既玩家，佢行走既路徑會留低一條黃色道路，只要係黃色路上行駛就會分階段得到加速 Buff，不過如果前面為隊友炒車的話，如無意外你應該會跟住佢一齊炒……

遊戲亦有分車種類型，包括「速度型（Speed）」、「技巧型（Technique）」同「威力型（Power）」，不過我試果陣就未係好搵到佢地之間既特性。因為每架車都可以作出改裝，大幅地改變座駕能力值，所以我地玩到咁上下都係睇樣黎揀車 :)。

配件要用「扭蛋」方式抽取，金裝就真係金色的

個人比較欣賞佢既故事模式，可以四人以分割畫面進行，唔洗次次都係朋友間互相廝殺

經過跳台時，可用右菇做花式，成功的話落地會獲得短暫加速

總結

《超音鼠賽車》改進孖車系統，作出唔少有趣既改變，係值得讚既地方。但係例如速度感、操控感等都同孖車仲有段距離，有進步空間。當然，以看門口招呼朋友、休閒競速類黎講佢夠交功課。整體黎講算係唔錯，Nintnedo Switch 既玩家有孖車比較之下的確未必對呢隻遊戲有興趣，PS4 就比較少同類遊戲，大家可以考慮入返隻同 FD 嘻嘻哈哈開心玩。

《超音鼠賽車》將於 5 月 21 日推出，對應平台 PlayStation 4 / Xbox One / Nintendo Switch / PC。順帶一提，如果 5 月 21 日至 26 日經開馬鞍山 MOSTown 新港城中心 2樓就有得試玩，仲有個限量版Tote Bag 送，詳情睇呢度。