有 PS4 既朋友相信都玩過《Until Dawn》（之前 PSN+ 免費），遊戲入面大家好似睇劇咁，逐步睇住劇情發展，但係又可以透過唔同選擇而改變劇情，呢種互動式玩法玩家們都非常受落。鍾意呢種玩法既朋友要留意，因為《Until Dawn》原廠今次同 BANDAI NAMCO Entertainment 合作，推出全新恐怖系列《The Dark Pictures》（黑相集），系列首集取名為《The Dark Pictures : Man of Medan》 （黑相集：棉蘭號）。

《The Dark Pictures : Man of Medan》（黑相集：棉蘭號）係整個黑相集系列第一集，故事講述五位唔識死既青年，佢地打算係假期入面出發去搵一架二戰時期沉入海底既飛機探險，點知預著一場暴風雨，意外地令佢地發現一隻幽靈船，而玩家既決定將會改變呢班青年既命運。

同《Until Dawn》一樣，遊戲最吸引既地方係你可以掌控角色之間既行動，玩家可以操控五位主角加一位船長，由每一位角色既視角去探索事件真相。為咗增加真實感，佢地每位角色都由真人演員擔任，其中一位主角 Shawn Robert Ashmore 之前仲做過《X-Men》入面既 Iceman。

遊戲中每個劇情都可以重覆遊玩，當然隨住玩家所做決定不同會引發蝴蝶效應，衍生出更多既分支及結局，最嚴重甚至會影響角色既存活，可以全員生還亦都可以係全員 GG。日前外媒 Gameinformer 就釋出一條長達十一分鐘既實機遊玩片段，感覺幾唔錯。

《The Dark Pictures : Man of Medan》預定於 2019 年推出，對應平台為 PS4、Xbox One、PC（STEAM）。