【活動報告】香港《Pentagon Fighters 2019》Q1 賽事・三強共獲一萬蚊獎金直入年尾決賽

 

剛剛過去嘅星期六(5 月 18 日)於香港舉行左今年第一次嘅《Pentagon Fighters》預賽,正因為係預賽,所以活動主打線上觀戰,不過因為冠亞季軍可共獲得獎金 HKD 10,000,所以本地唔少高手玩家都齊集活動場地,享受與高手切磋對戰之餘,亦爭取機會參考其他選手嘅攻防技巧。

 

比賽有本地及外地選手參與

 

《Pentagon Fighters》由組織 Pentagon 主辦,對上一次搞比賽係 2018 年 12 月喺澳門威尼斯人嘅《Pentagon Fighters 2018》 ,比賽以舉辦《街霸 V》項目為主。

今次活動共有 60 位以上本港及外地選手參加,當中不乏大家熟悉嘅面孔,例如剛剛出戰完 Capcom Pro Tour 嘅專業選手 Humanbomb、Hotdog29、Denesis 等等。

 

Denesis 與 Hotdog29

 

不過比賽目的其實係想比機會各界玩家參加正式比賽,所以招募係對大眾公開的,所以亦有唔少新紮選手參與,當中唔少係近年先至加入格鬥遊戲界嘅年輕新血!

 

是次活動最年輕參賽者 Kevin 仲係初中學生!據說成績非常好,所以父母都鼓勵佢參與其他興趣活動

 

比賽採用 Double Elimination 賽制,除左現場有大螢幕比大家睇比賽之外,亦同時進行  Twitch 以及 Facebook Page 網上直播;格鬥遊戲嘅魅力之處在於,就算唔識玩,都能夠享受觀看激戰連場嘅樂趣,所以網上留言區喺接近 5 小時比賽入面,一直反應熱烈,唔少網友及觀眾都睇得甚為肉緊。

 

我地嘅選手都打得好肉緊!@Humanbomb

 

最後,今次預賽嘅得獎者及獲得獎金金額分別為:

冠軍:Chris Wong(HKD 6,000)
亞軍:Humanbomb(HKD 3,000)
季軍:Hotdog29(HKD 1,000)

三位以及殿軍將會成為《Pentagon Fighters 2019》種子選手,直入將於年尾舉辦嘅決賽!

 

 

今次活動仲好榮幸得到高端路由器著名廠商  NETGEAR 大力贊助,並提供專業電競 Router XR700 ,確保比賽無論連線以及做直播 Streaming 都網速無阻;亦要多謝 BenQ Zowie 借出電競螢幕,以及遊戲零售龍頭電氣良品贊助遊戲配件。

 

 

今次活動只係第一次預賽,據說活動將會在約七月份舉行第二次預賽,預計下次活動將會在更大場地舉行。如果你都技癢想參加比賽,又或者想黎親身觀賽,就記得要繼續留意我地 VJGamer 公佈最新消息啦!

 

直播重溫:

Pentagon Fighter Top 16

今日舉行既「Pentagon Fighters」進行得如火如荼,已經打到 Top 16 階段,水準超高!

VJGamer 遊戲殿さんの投稿 2019年5月18日土曜日

 

相關文章:

【港澳遊戲展覽 2018 詳細匯報】Gamerbee 親臨《2018 Pentagon Fighter 街霸 V 比賽》職業選手&明日之星!
【硬件評測】NETGEAR 入門級電競 Router XR300 品質高又抵玩
【用品評測】直播測試結果無得呃!NETGEAR 電競級 Router XR700 速度穩快實至名歸

產品查詢:

NETGEAR XR700 Router
NETGEAR XR300 Router

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章