如果有一日你要結婚，你對你自己嘅婚禮會唔會有咩特別想法？例如場內播《高達》主題曲之類？

日本作為二次元大國，有唔少友誼以及情侶關係都係由 Online Game 中產生，例如係擁有超多玩家數量嘅《Final Fantasy 14》。神奈川縣一間婚宴專門店「deuxzero（デゼーロ）」有見及此，就同《FF14》合作，正式將遊戲裡面嘅特點同埋氛圍帶到黎結婚現場，相信如果閣下係《FF14》Fans 的話，呢種婚宴一定會令你好開心。

店方會將一對新人嘅樣改圖成為《FF14》裡面嘅角色做成周邊，會場裡亦會播放遊戲主題曲以及 OP 動畫（無錯，係 OP 動畫，而唔係成長片段！LOL）黎增加氣氛；而舞台亦會模仿遊戲入面角色結婚時嘅背景，務求要令來場人士滿足而回。

最好笑嘅係，我諗無邊個婚宴場所會為一對新人準備「武器」……。講緊嘅，當然係遊戲中你所使用嘅武器啦，按職種而分，1：1 等身大小添架！

場內上至食物、下至佈置，都以《FF14》 為主題。唔知陸行鳥主題係咪即係主食糧係雞？（誤）

會場提供三種預設佈置，可以招待 2～165 人，假如新人有特別要求可以再同店方提出。不過價錢方面就無公開，要直接去同店方自己慢慢傾啦！

雖然身在香港嘅各位應該好難享有到呢一種服務，不過大日子上面可以按自己喜好黎進行，都係值得開心嘅～

祝有情人繼續攻城順利～

最後為大家送上《FF14》最新一章 Trailer：