【遊戲介紹】車站地下街發達大法《Overcrowd: A Commute ‘Em Up》超上癮經營系小品登場

 

經營系遊戲一直深受玩家歡迎,近年為人熟悉嘅經營遊戲,相信大家都會聯想到開羅工作室(Kairosoft)旗下一連串各具特色嘅作品;不過,除左佢地之外,其實仲有好多工作室都不斷開發有趣嘅經營類型遊戲,例如今日同大家介紹呢一隻《Overcrowd: A Commute ‘Em Up》。

《Overcrowd: A Commute ‘Em Up》由獨立遊戲工作室 SquarePlay Games 所製作,主題係地鐵車站營運。玩家除左要開山鑽地去開通車站、仲要因應乘客嘅需求,去將個站逐步改良同埋提昇,以建造最強地下街為遊戲目標就絕對沒錯了!

 

 

去過台北嘅朋友,想必一定有行過台北地下街;四通八達嘅樓層、各式食品消費店舖,簡直係方便生活嘅最佳設計;玩家喺呢隻遊戲裡面,或者都可以用自己親身體驗過嘅經驗作為靈感。

點樣建立路軌去連結地方?站入面又要有啲咩商舖同設施,先至叫做最方便乘客呢?除左起野之外,玩家仲要請員工去運作每個車站,所以遊戲自由度非常高,聽落亦都非常耐玩!

 

 

遊戲入面嘅運作亦都非常真實,例如地板污糟,你要搵人黎清潔;列車延誤,然後啲人會躁!各位香港嘅讀者們,大家平時對港鐵有啲咩不滿,全部喺遊戲中都可以自己作出改善呀下(喂)

遊戲內置三個模式,分別為「Procedural Campaign」以不斷擴展車站、解鎖新設施為目標嘅基本玩法;「Sandbox Mode」玩家自由經營玩法,以及「Commute of the day」由系統隨機生成一個半開發車站去比你經營;玩家亦可以選擇遊戲難度。

 

 

呢隻遊戲入選「Indie Prize Showcase 2019」嘅最終候選名單,所以都備受各界關注以及期待;如果你都鍾意經營系遊戲,本作品將於 6 月 6 月上架,對應平台為 Steam。

 

Steam 購買頁

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章