【玩物評測】 LEGO 阿波羅登月艙 開箱

為紀念登月 50 週年而推出嘅 LEGO 10266 NASA Apollo 11 Lunar Lander,六月一號正式終於同大家見面,我地梗係第一時間搵盒返嚟同大家完整開箱,睇睇呢個登月艙有咩驚喜帶到比大家!

10266 NASA Apollo 11 Lunar Lander – 1087件

包裝盒側面亦印有美國太空人岩士唐 (Neil Armstrong)名言 “這是我個人的一小步,卻是全人類的一大步 (That’s one small step for man, one giant leap for mankind)”

話就就過千件組件,不過只係分為四大製作部份。

相比 21309 NASA Apollo Saturn V ,今次呢張貼紙都算多啦

今次製作書內有成十幾頁阿波羅11號登月艙嘅相關資料,由美國總統甘迺迪提倡阿波羅登月計劃到真實登月艙內部結構簡介都有記錄喺當中

 

未開始砌之前都講返少少登月艙嘅史實資料比大家了解下啦,成個登月艙嘅功用除左為登陸月球表面之餘,另一個重要用途係將登月太空人送返月球軌道。登月艙我地可以大至分為下降級上升級兩部份所組成。
登月艙下降級包含有起落架、登陸雷達天線、降落火箭引擎、以及登月所需燃料。上升級則包含船員艙、儀錶板、艙蓋/對接口、前艙門、光學電子導航系統、反推力系統、雷達及通訊天線、上升火箭引擎、以及用於返回月球軌道同太陽神指令/服務艙交會時所需嘅燃料,上升級船員艙內仲有為兩名太空人提供四至五天的維生系統。之後《太陽神13號 ( Apollo 13)》事件中就係呢套登月艙嘅維生系統救三個太空人一命。

10266 NASA Apollo 11 Lunar Lander 當中包括兩隻太空人 Minifigures,分別代表太空人尼爾·岩士唐 (Neil Alden Armstrong)、伯茲·艾德靈 (Buzz Aldrin)

Minifigure 身上印 NASA 左嘅標誌,不過就冇提供埋髮型件,除左眼眉有顏色上同表情有分別之外,真係分唔到邊個係第一個踏足月球嘅岩士唐

先講講第一部份所製作嘅場景底座,清楚見到印有 “Apollo 11 Lunar Lander” 嘅字樣,佈置上用平面同顆粒去模仿月球表面,除左明顯嘅隕石坑之外,亦見到左下方有六格扮「腳印」嘅設計。用組件去砌成個場景底座,相比七、八十年代取用一塊過成型嘅模仿月球表面底版,改動性就相對高好多。

整個 26×28 底座 (約 20.8 x 22.4 cm),相比之前好多產品嘅擺放空間都算細

腳印嘅位置

四個角落連起落架嘅支撐點都做定

輪到下一部份就係整個登月艙下降級部份,未砌之前大家都可能以為成個八角形嘅設計入面只係將同樣嘅設定重覆 4 次組合,但實際上完全唔係咁發生。事關登月艙下降級原本就有好多暗格去收納唔同裝置,同樣喺 LEGO 嘅版本亦還原到呢部份嘅設定。

近年嘅製作書仲多左好多解說資料

有埋對比圖,係咪還原得一模一樣先

特登用到金色反光漆嘅組件,其實係比大家了解到呢部份喺實物登月艙係用上一啲特別嘅保護物料去做,所以話今次係好重教育意味

喺登月任務完成後登月艙下降級部份就會永久留喺月球表面,就好似呢個情況一樣

下降級其中一個暗格係收埋左一個好重要嘅裝置

呢個「激光測距反射器」其實係用作測量地球同月球之間嘅準確距離,我地都係靠佢先知道地球同月球之間每年有 3.8 cm 嘅增長

下降級機身另一個暗格就係收埋當時拍攝太空人步出機艙踏足月球第一步嘅攝錄機

唔好漏左喺起落架上嘅登月紀念牌

起落架同底座預設位置

最後整埋登月艙上升級,成個 10266 NASA Apollo 11 Lunar Lander 就正式完成。

上升級喺製作設定上非常貼心,將艙門、連接通道部份以及艙尾三部份獨立用兩組扣件連接,令大家玩起上嚟可以輕易打開睇到內部結構設定

將艙門部份分離就可以睇到艙內如實物一樣,只能夠容納兩個太空人

拆開艙尾部份,我地就了解到太空人係要屈身先可以離開船艙

上升級外面就有住好幾組天線同小型噴射器,就係當完成月球表面任務後返回月球軌道時調整角度用

呢個喺上升級艙頂嘅,其實就係當返到月球軌道同服務艙嘅連接通道

上升級底部仲有一組噴射器,就係脫離下降級返回月球軌道嘅主要噴射器

21309 NASA Apollo Saturn V登月艙擺埋一齊就更加覺得今次 10266 NASA Apollo 11 Lunar Lander 更出色

特別一提,如果大家用一支普通書枱燈,都已經可以幫 10266 影到好多「登月場面」

總結

今次 10266 NASA Apollo 11 Lunar Lander 成功透過組裝體驗以及細節還原,帶玩家重新進入對太空探索、充滿激情與浪漫六十年代。而且作為一款 NASA 官方認可嘅阿波羅 11 號登月 50 週年紀念產品,佢可以話已經達到博物館展品級數,可以放喺辦公室或客廳展示知識份子人文氣息嘅一件收藏品。

LEGO 10266 NASA Apollo 11 Lunar Lander

  • 發售地點:LEGO Certified Store
  • 地址:  – Langham Place L12 Shop 01B
    – Times Square Shop 902-3C
    – New Town Plaza Shop 416
    – Cityplaza Shop 012

 

阿九

阿九 打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enough! Lego Enthusiast https://goo.gl/HRnxDW

追蹤

更多文章