【遊戲攻略】《Monster Hunter World: Iceborne》全武器新動作 改動及新增技能解讀

萬眾期待,九月推出嘅《Monster Hunter World》大型更新「Iceborne」啱啱就釋出晒全武器新動作片段,不過全部都只係簡單演示片段未必人人睇得明,而且詳細嘅解說,要喺推特逐個 Post 搵,所以特登寫咗呢篇「全武器新動作改動及新增技能解讀」,希望幫到大家。

 

 

新動作「飛翔爪」:

 

使用中會消耗耐力值,命中後會拉近,並可接技或控制魔物衝撞方向等

1)飛翔爪接攻擊會令部位進入「破損」,該肉質變軟

2)片手、雙刀、蟲棍、弓、太刀、銃槍、輕弩會出現掉落物

2)大劍、長槍、槌、笛、斬斧、盾斧、重弩,會產生更嚴重「破損」

 

 

大劍:

1)儲力中可接強力投射;再接接真蓄力斬

2)真蓄力斬首段命中(15 動作值嗰一擊)會令第二段大大力

 

大劍接近無改動;強力投射打怯魔物,以方便更準確蓄力斬咁。另外,就係非常實在地為真蓄二段提供增傷方法。

 

 

太刀:

1)特殊納刀;使用中持續扣減耐力,會有霸體及傷害減輕效果;可接居合斬或居合氣刃斬;受各拔刀術影響;

2)居合斬:若於被攻擊一瞬使用,其後會出現類似兜割後氣刃充填狀態

3)居合氣刃斬:消耗一格(紅變黃)氣刃,更高威力居合;若於被攻擊一瞬使用,將不消耗氣刃

 

本次新動作中,最觸目一件武器。將《Monster Hunter XX》勇氣風格嘅特殊納刀及狩技鏡反都加入來;主要係提供「見切>兜割>見切」循環以外嘅選擇。新動作表現會如何?視乎 Master Rank 中,係唔係有拔刀術太刀嘅使用空間。(但帥呢樣嘢,唔係睇實用度)

 

 

雙刀:

1)回避強力投射;連擊中之回避,可使用強力投射,其後可接攻擊

2)鬼人化中飛翔爪攻擊,其後可接上回旋斬。

 

其實改動偏少,但雙刀連技中嘅回避,改變成武士道「Just 回避」一樣動作,無效時間變長,同時可以用強力投射打怯魔物,提高咗雙刀生存力。

 

 

片手:

1)回避及連技中,可接昇龍飛翔爪

2)持武狀態下,投射可切換為強化投射

3)「Just Rush」,此連技中,異常值貫入嘅連續攻擊;成功目押的話,提高動作值及屬性值

 

當所有武器都可以持武投射器,又有飛翔爪騎怪,優勢削弱,影響最大嘅片手劍,自然要加入新動作。昇龍飛翔爪,為片手提供對空手段以及迅速接近手段,近戰中能夠做到絕對對空,應該得片手可以。另外,「Just Rush」亦係相當大幅度強化,要知道近戰武器異常值只有 1 / 3 機會觸發,而「Just Rush」直接貫入的話,等於著咗化合衣裝;而且目押成功,仲可以有高嘅動作值、屬性值,可以唔洗出死一套「跳斬>跳盾」。但「Just Rush」夠唔夠彌補片手失去嘅優勢,我都幾保留…

 

 

槌:

1)儲力中可應用強力投射;其後可維持儲力

2)飛翔爪接風火輪

 

同大劍一樣,屬於無甚改動嘅一員。比較有睇頭嘅係,飛翔爪抓中頭後,接風火輪車埋去;加上飛翔爪攻擊後部位「破損」,多一種斜坡以外,容易擊暈又高傷害嘅手段,點都係有幫助:特別係對嗰啲追頭苦手。

 

 

狩獵笛:

1)回音擊:對高打擊點連續攻擊,而回音擊會生成回音音符;

2)回音泡:演奏含回音音符樂譜,建立一個 buff 嘅泡狀物,有隊友經過時,上buff(改善啲補血笛?(高周波可唔可以用回音泡?

3)有新音色:自我強化(速)& 回避性能up

 

狩獵笛,喺《MHW》中加入重奏嘅高傷害動作後,再次有新嘅攻擊動作。雖然未知佢嘅動作值多少,但係集中打點,短時間內貫眩暈值,就已經值得期待。打得暈隻怪,就可以放心一套高傷害嘅重奏。而衍生嘅回音泡有無用,好視乎咩音色;例如 HP 回復類會最受惠,因為演奏時,對方未必要補血,到對方要補血,又未必吹得切;另外,如果高周波可以用回音泡,等魔物/獵人接近時再發動,就會好有用。

另外,回音泡既然係行近去觸發,即係話笛手唔應該企埋一邊齋吹。

 

 

長槍:

1)擋格強化投射/飛翔爪:強化射擊/飛翔爪於擋格中嘅預備動作;格擋性能上升

 

除咗持武可用以投射器之外,睇唔到有咩有用嘅新動作。

 

 

銃槍:

1)擋格強化投射/飛翔爪:強化射擊/飛翔爪於擋格中嘅預備動作;格擋性能上升

2)裝填起爆龍杭:將投射器子彈裝到龍杭炮上,按投射物影響附著時間及數目

3)起爆龍杭:附於魔物身上,炮擊會觸發(未知其他獵人攻擊會否觸發)

 

起爆龍杭,算唔算係為咗改善以往 G 位炮擊無力而設嘅新動作?本身龍杭炮斬炮混合傷害都係為咗咁,但由於大家好少用,所以再 Buff 一下龍杭炮。銃槍飛翔爪攻擊屬「破損」較少,但會掉落投射物一類,方便用起爆龍杭。

 

 

斬斧:

1)斧強化叩擊:振斧到一定次數後,可以打出一擊高動作值嘅叩擊,隨後進入 斧強化狀態;更容易儲怯值(《MHXX》狩技搬運)

2)斧強化投射:部份攻擊可接投射器,繼而接變形振斧斬

3)屬解中可接飛翔爪;飛翔爪可接零解,期間受飛翔爪攻擊影響,瓶傷害上升。

 

如果閣下嘅斬斧係斬劍的話,新動作與你完全無關。而變形振斧斬,如果瓶量不足,會變成入瓶嘅後搖危險,喺呢個時候轉而向斧強化叩擊,可以仍舊打出大傷害之餘,進入斧強化狀態後,容易打怯魔物,增加控制力。強力投射接變型振斧斬,提供更多機會出呢招最高動作值嘅攻擊。頭兩個新動作,都係鼓勵斬劍玩家玩多啲斬斧。而最後嘅「屬解>飛翔爪>零解」係提供方便「屬解前可能未進入高出力狀態,入咗高出力之後接飛翔爪,再零解」,配合上飛翔爪攻擊會強化攻擊嘅特性,零解其實係提高咗傷害。

 

 

盾斧:

1)斧強化狀態:只要仲有瓶,於高解予備動作中,可使出屬性回填斧強化斬,進入斧強化狀態;狀態中會隨時間消費瓶

屬性瓶:屬性攻擊力 up,瓶消費速度慢

榴彈瓶:物理攻擊力 up,瓶消費速度快

2)強化射擊:斧攻擊後 / 舉盾時,可以強化射擊;盾的格擋性能上升。

 

盾斧嘅斧強化狀態,令高解等嘅動作出現多次打擊,明顯係為咗 Buff 屬性斧而設;加上本身屬性瓶與超解之間相性唔好;新動作出現後,屬性瓶就「斧強化>高解」,榴彈瓶就繼續超解。

 

 

操蟲棍:

1)空中急襲突刺:比三角回轉更快,方便落地接技,並會拍一次蟲印。

2)空中飛翔爪

3)獵蟲強化:用投射物令獵蟲可以儲兩個精華、各色精華時間延長;按投射物嘅效果強化

 

獵蟲強化分兩種,按餵嘅投射物分為;

魔物身上掉落投射物為:獵蟲強化(力):加強獵蟲攻擊力,蟲粉塵更密;

地圖上撿拾投射物為:獵蟲強化(氣):獵蟲耐力消耗半減,三燈精華時間延長

 

操蟲棍會強化空戰,實乃預料之內。因為空中動作值實在有啲唔太夠…空中急襲突刺,可以話係一招高動作值(官方話係強力攻擊)加上拍蟲印嘅動作,本來拍蟲印只有地上先有。強化空戰嘅棍蟲互動,同時間空中飛翔爪可以令飛咗唔去邊嘅空戰獵人多一種接近魔物嘅手法。而獵蟲強化嗰套新動作,應該可以改善《MHW》中精華時間短、收集精華花時間嘅問題。

 

 

弓:

1)切換瞄準:切換弓/投射器之間描準

2)龍之千千矢:投射器瞄準時,將投射物置入弓中,打出高傷害但射程短嘅龍之矢

 

如此少嘅改動話你知,《MHW》中弓已經做得好完美。

 

 

輕弩:

將有第四格改造欄,並新增兩個改造選項

1)回避裝填:回避時裝填一粒子彈;可複數裝備

2)起爆龍彈改造:可以發射反擊龍彈;射出起爆龍彈嘅子彈,魔物攻擊時會爆炸;只能夠裝一件

 

基本上兩者都係實用嘅擴充,無咩好挑剔。

 

 

重弩:

將有第四格改造欄,並新增三個改造選項

1)特殊照準:超遠射程照準,並新增超適正距離,該距離內傷害再提升

2)機關龍彈改造:機關龍彈連續命中時,傷害會更進一步提升

3)狙擊龍彈改造:狙擊龍彈將失去貫通性,改為於著彈點連續爆發

 

簡單啲來講,就係重弩嘅霰彈已經夠強;但貫通彈好弱,所以加入特殊照準;特殊彈會進一步強化,改善無人用佢哋嘅問題。

 

另外弩類仲新增二個輕重弩共通強化配件,分別係:

重子彈:貫通傷害間隔變短,追加減氣值、眩暈值;不可重覆,無法與輕子彈共存

輕子彈:有效射程變長,彈速變快;不可重覆,無法與重子彈共存

 

 

整體而言,好多都係針對無人用嘅動作、玩法去強化;加上拔刀投射器、飛翔爪多咗一邊控制技巧,啲怪會好高難度嗎?而片手喪失嘅拔刀投射器優勢,能唔能夠單憑昇龍飛翔爪、「Just Rush」就足夠彌補…好睇異常值同啲控制效果。《Monster Hunter World: Iceborne》PS4 / Xbox One 版本將於 2019年9月6日正式推出,PC Steam 則預定冬季發售。

 

古渡

古渡 《Pokemon XY》400小時遊玩時間,天梯賽1700以上嘅非專業玩家。閒時會寫下嘢咁

追蹤

更多文章