Ubisoft 旗下其中一個遊戲 IP《Watch Dogs》分別於 2014 年及 2016 年推出 1＆2 集，遊戲以駭客以及大家而家日常日日都會用到嘅電子用品以及互聯網作為題材，反映政府對人民監控嘅問題。遊戲兩集風評唔錯，然而第三集一直未有消息。

然後，根據 IGN 及 GamesInformer 等外媒嘅報導，尋日 Amazon UK 就有一隻 Ubisoft 新遊戲上架，名為《Watch Dogs Legion》。Amazon UK 嘅商品網址由 6 月 3 日公開到今日 6 月 4 日 15:00 時份都仲生效，但係筆者於 17:00 嘗試再入連結，商品頁則已為移除。

截圖如下。

由於《Watch Dogs 3》一直都係玩家注目期待嘅作品，所以《Watch Dogs Legion》嘅流出，都令一眾網友大為驚訝；因為 Amazon UK 上面形容遊戲係「玩家可以飾演你所想扮演嘅角色（NPC）去進行唔同嘅劇情」，就咁聽就似乎有非常大嘅靈活度同埋彈性，但與早前兩集又好似有些許風格上嘅轉變。

IGN 已經馬上向 Ubisoft 查詢，但係目前未有正式回音。馬上就係 2019 年 E3，眾多遊戲廠商都開始發放新作品嘅消息，唔知今次 Ubisoft 嘅 Showcase 會唔會提及有關《Watch Dogs》系列嘅最新消息呢？