【試玩心得】唔覺唔覺會玩上癮 率先試玩《LEGO Tower》

之前介紹過會喺 7 月 1 號正式登陸手機平台嘅《LEGO Tower》嘅Beta 版就已經上左架,大家如果想第一時間開 Game 就即刻去文尾嘅傳送門下載左先都得。而如果你決定留喺度睇埋試玩心得,咁首先多謝你支持啦!


作為冇玩過《Tiny Tower》嘅我,今次用 LEGO 去做主題,當然就食正我地 Fans 呢範啦!《LEGO Tower》成個遊戲簡單介紹嘅話,就只係你要營運屬於你自己嘅大廈,而每層樓層都有唔同嘅營運需要(其實都主要係講錢)。而作為「業主」嘅玩家除左要幫佢地入貨之外,另一主要工作就係將「客人」帶到適當嘅樓層,咁就可以持續賺錢去擴建你嘅大廈。除左頭先所講嘅基本遊玩目的,點營運得好就要了解下你租客善長咩項目或者佢夢想工作係邊樣,分配得好嘅話收入就自然增加啦!

有棟樓都唔係淨收租咁簡單

周不無時就有個 Pizza 仔嚟面幫佢搵返特別物件,搵完就當然有獎勵啦!

遊戲過程中就會不斷收集到唔同嘅 Minifigure 配件,你可以用嚟裝扮自己嘅角色或者其他「租客」

儲齊配件仲可以開到啲特別 Minifigure 出嚟成為你嘅「租客」

想快啲儲多啲 Minifigure,比錢開箱抽都得架!

而成隻遊戲有幾樣不得不佩服嘅地方係,「租客」會寫啲特別嘅意見或者訊息比你,你撳左落去就會跳到 LEGO.com 嘅網店度睇到相關嘅產品,呢個咁掂嘅植入式廣告方式,比佢諗得到都真係無得頂!

就好似呢個「留言」咁,你撳左落去就會話你知 LEGO 10266 NASA Apollo 11 Lunar Lander 賣緊啦!

而喺大廈嘅報置設施上,有啲亦講明係同現實產品有關。

總括嚟講,暫時見得到《LEGO Tower》呢個遊戲唔會似之前好多嘅 LEGO Game 一樣只係營運一個短時期就摺,你見佢將成隻 Game 變成一個產品推廣平台就知佢想法幾長遠啦!而且成隻《LEGO Tower》以消磨時間嘅作品嚟講都算唔錯,成個營運流程亦非常豐富(我個人覺得有啲太密添)!加上入成隻《LEGO Tower》佔嘅容量都唔夠 200 MB,Fans 免費 Download 落嚟玩下都開心啊!

暫時 IOS 版 Open Beta 就要用 TestFlight App去裝,而 Android 就確定接受測試就可以 Download 得到,所以大家快啲去下面傳送門度 Download啦!

《LEGO Tower》Open Beta 傳送門

阿九

打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enough! Lego Enthusiast //goo.gl/HRnxDW

追蹤

更多文章