【遊戲新聞】超能力動作遊戲《CONTROL》 新片技能演示喜出望外

今年遊戲界過咗三月之後就好似靜晒,雖然黎緊 E3 就會有一大堆新遊戲公布,但係喺已公布嘅遊戲入面都仲有幾隻係非常值得留意,好似呢隻超能力動作遊戲《CONTROL》(狂燥)就非常令人期待。日前外媒 PC Game 就放咗最新嘅 Gameplay 片段出黎,演示技能令人非常喜出望外。

 

 

超能力動作遊戲《CONTROL》由 Remedy Entertainment 推出,日前外媒 PC Gamer 就放咗條技能演示片出黎。喺之前嘅片段我地已經知道主角會有一把可變型既手槍作為主武器,而超能力就分別有:飛行、隔空控制物件(原力取物咁)、心靈控制、防護盾等等,今次嘅片段就係演示隔空控制物件攻擊敵人。

 

 

之前睇片仲以為「隔空取物」只係超能力版《人中之龍》,隨手拎起周圍嘅物件攻擊敵人。但根據呢次影片介紹,原來隔空取物唔淨止係可控制場景內嘅放置物,如果無指定物品係可以係牆上拆舊水泥出黎攻擊敵人,亦即係話整個場景都係可使用嘅武器,非常爽皮!

 

 

根據 Remedy Entertainment 所講,佢地唔希望玩家們將心思用黎搵場景中有乜可以用黎掟,大家專心去享受遊戲啦。《CONTROL》預定於今年 8 月 27 日上市,對應平台為 PS4 / Xbox One / PC,而 PC 版本將由 Epic Store 獨佔 1 年。

 

五木

五木 動漫電玩宅,極愛金田一系列,擅長動作及策略遊戲

追蹤

更多文章