喺 2017 年 12 嘅時候，電影《逃出魔幻紀：叢林挑機（Jumanji: Welcome to the Jungle）》於香港上映，故事講緊後生仔意外發現一餅古舊遊戲帶，名為《Jumanji》，點知一開 Game 就比人吸左入遊戲世界裡面，化身為故事中四個角色。

電影唔知大家有無睇過，但係其中一位主角「The Rock（狄維・莊遜）大家一定會認識，因為大熱電影作品《狂野時速》5～8 集裡面都有佢！

Bandai Namco Entertainment Europe 早前宣佈會將電影「實體化」為遊戲，名為《Jumanji: The Video Game》，係一隻四人Online 聯機動作歷險遊戲，預計今年 11 月 16 日登場，全平台登錄，分別為 PS4、Nintendo Switch、Xbox 以及 Steam。

《Jumanji》原為一本於 1971 年推出嘅繪本，後來於 1995 年比荷里活睇中改篇成電影，當年嘅男主角為現在已故嘅男演員Robin Williams（羅賓·威廉斯），當時角色進入嘅並唔係電子遊戲，而係棋盤遊戲。去到 2017 年嘅電影版，其實係向原版電影致敬嘅 Reboot 及改篇版本。

即將推出嘅遊戲版本，角色模組同電影裡面見到嘅一樣，玩家可以操控 The Rock 喺叢林冒險，目標係要打爆機全身而退、回到現實世界！遊戲有故事模式，亦有競賽模式；角色各自有獨立升級系統，而達到一定條件後，亦會於遊戲中解鎖新關卡。

暫時未知遊戲會唔會有繁體中文化版本，不過作為一隻同朋友一齊玩嘅遊戲，呢隻《Jumanji: The Video Game》似乎都值得各位玩家留意！以下為遊戲宣傳片：