【E3 2019】英雄士官長重臨 《Halo Infinite》下年與新世代 Xbox 共同面世

今日由微軟所舉行嘅 Xbox E3 展前發表會,正式發表旗下皇牌系列之一嘅《最後一戰》(Halo)系列最新作《最後一戰:無限》(Halo Infinite),同時釋出首條宣傳片 「Discover Hope」,並且確定遊戲會於 2020 年伴隨新一代 Xbox 主機「Project Scarlet」同步推出。

 

 

《Halo Infinite》照舊都係由 343 Industries 開發,不過今次就使用全新遊戲引擎「Slipspace Engine」製作(特式係情感表現極為像真)。故事發生時間緊接於《最後一戰 5:守護者》之後,並且延續原有故事線。雖然係咁,但係 343 Industries 最高負責人 Bonnie Ross 就表示過今集屬於精神上嘅 Reboot,同時亦係《最後一戰》系列主角「士官長」嘅新旅程,就算未接觸過本系列嘅玩家都可以輕鬆入手。

 

 

《Halo Infinite》今次片段敘述喺太空漂流好耐,並且已陷入絕望邊緣嘅 UNSC 士兵,意外發現同樣係宇宙中漂流嘅傳奇英雄「士官長」,及後將之從沉睡中喚醒並再次踏上同人類存亡攸關嘅戰役。遊戲雖然暫時未有實機遊玩影片,不過坊間早就有傳聞話今集係開放式世界,期待更進一步資訊,《Halo Infinite》將對應 Project Scarlett、Xbox One 及 PC 。

 

 

 

有咁強勁嘅新機護航作,新一代 Xbox 主機「Project Scarlett」效能自然備受注意。「Project Scarlett」將會同 AMD 合作,搭載配備 Zen 2 核心 CPU 及 Navi 架構 GPU,特別訂製嘅處理器。最高可輸出 8K 解析度及 120fps(估計唔係同時輸出),高達 4 倍 Xbox One X 效能。另外仲會支另外仲會Ray Tracing 技術,以及使用特別製作嘅 SSD 作「虛擬記憶體」使用,聲稱比現時主機效能強 40 倍,好似好勁咁。

 

 

當然大家最關心嘅都係遊戲陣容,無 Game 玩你曉飛都無用。除咗上述《最後一戰:無限》(Halo Infinite)作為護航作,於 2020 年底同步推出外,仲可以玩晒橫跨 4 個世代 Xbox 數以千計嘅遊戲,不過都係正正經經傾多啲有質數嘅遊戲返黎先啦!(比返隻《Scalebound》我!)

 

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章