《Final Fantasy VIII》終於要推出 Remastered 版本！Square Enix 於今晨舉行嘅發佈會，公開經典遊戲《FFVIII》終於完成高清化，並預計會於今年內推出《FFVIII Remastered》版本，對應平台為 PS4、XBox、Nintendo Switch 以及 Steam。

《FFVIII》首度推出時為 1999 年，當時對應平台為 PS1，對於廣大亞洲地區玩家黎講，喺精彩劇情背後，仲有一樣令人難忘嘅事，就係《FFVIII》係系列首次起用歌手演唱主題曲，而當時起用嘅歌手，係紅遍亞洲嘅王菲。王菲亦憑呢一首「Eyes On Me」成功衝出亞洲，為歐美玩家所熟悉。

今次 SE 宣佈《FFVIII》，網上反應頗為兩極，因為當《FFVII Remake》推出日已經塵埃落定之後，大家一直期待嘅，係全新《FF》系列遊戲嘅消息，又或者係《FFVIII》會成為下一部重製作品嘅消息，所以知道有《FFVIII》，但只係高清移植版本，網上面有人表示失望。

但係，對於《FF》系列 Fans（我！）或者因為近年作品《FFXIII》或《FFXV》而對《FF》舊作產生興趣嘅玩家黎講，《FFVIII》嘅高清版本，仍是有其意義喺度的！因為，熱愛炒冷飯嘅 SE，咁多年黎，不斷將舊作移植到手機或者其他平台上面，惟獨是《FFVIII》，喺事隔 20 年後嘅今日，先至首度正式做公式高清發佈！至少我一定會入手，懷愐下都好吖。

畢竟係 1999 年嘅作品，所以高清左都會同而家嘅新作品喺畫質上有一段距離；不過，遊戲，係好玩的；劇本，係難忘的；記憶，都仲係鮮明的。好希望今次呢個 Remastered 版本，可以同時收錄到「Eyes On Me」呢首主題曲，因為呢首歌，配合劇情的話，喺 Fans 心目中嘅地位，無可比擬呀。