【E3 2019】死亡習作經典再現《Blair Witch》夏日消暑靈異作品 8 月登場

 

八九十後嘅朋友,相信一定會聽過或者睇過 1999 年美國恐怖電影《死亡習作(The Blair Witch Project)》,電影掀起左實寫紀錄片模式拍攝嘅恐怖電影熱潮,而電影裡面「Blair Witch」呢個虛構傳說,亦成功令到美國全城陷入熱潮,信而為真,唔少人仲組團去電影取境地想一探究竟。

呢部低成本嘅電影,亦成功換來碩大片房收入,可以話係近代恐怖電影嘅經典之一。

事隔多年,喺早前舉行嘅「Xbox E3 Briefing 2019」裡面,Microsoft 就公佈會推出同名第一視點恐怖遊戲《Blair Witch》,對應平台為 Xbox 及 PC,支援 Xbox Game Pass,已定於今年 8 月 30 日發售。

 

 

遊戲由曾開發《Layers of Fear》嘅 Bloober Team 負責製作,係一個以《死亡習作(The Blair Witch Project)》嘅世界觀作為基礎,繼而重新撰寫劇本嘅故事。

故事背景為 1996 年。退役警官 Ellis 發現左一盒錄影帶,發現與一班年輕人嘅失蹤有關,所以隻身去到馬利蘭州(State of Maryland)Burkittsville 嘅黑山森林(Black Hills Forest)搜索。

傳說呢個森林受到女巫咀咒,隻身進入森林嘅 Ellis,惡夢從此開始。

 

 

 

遊戲走心靈恐怖路線,玩家到底可唔可以發現真相,同時全身而退,就係遊戲嘅重點。有睇過電影嘅朋友或者會更加感受到遊戲想要表達嘅詭異不安感,如果你係恐怖遊戲嘅 Fans,呢一隻遊戲,或者係你今年夏末可以考慮挑戰嘅作品。

 

 

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻!

追蹤

Facebook 更多文章